विराटनगर-कोशी प्रदेशका मुख्यमन्त्री हिक्मतकुमार कार्कीले कोशी नदीमा आधारित पर्यटनको समग्र विकास गर्ने प्रतिबद्धता व्यक्त गर्नुभएकाे छ।

पछिल्लो समय लोकप्रिय बन्दै गएको सुनसरीको वराहक्षेत्र नगरपालिकास्थित बोराबाँधमा सूर्यास्त अवलोकनका लागि आइतबार साँझ पुगेका मुख्यमन्त्री कार्कीले यहाँको पर्यटन प्रवद्र्धनका लागि प्रदेश सरकारले आधारभूत संरचना निर्माणमा सहयोग गर्ने प्रतिबद्धता व्यक्त गर्नुभयाे । प्रदेश सरकार, निजी क्षेत्र र स्थानीय तहको सहकार्यमा विकास अघि बढाइने उल्लेख गर्दै उहाँले कोशी नदीसँग जोडिएका सम्भावना र चुनौतीको पहिचान गरी प्रदेश सरकार आवश्यक भूमिका निर्वाह गर्न तयार रहेको धारणा व्यक्त गर्नुभयाे।

मुख्यमन्त्री कार्कीले स्थानीय पर्यटन समितिलाई क्षेत्रका समस्या र आवश्यकताबारे लिखित रुपमा सरकारलाई जानकारी गराउन आग्रह गर्नुभयाे। सरकार कोशी नदीमा आधारित पर्यटन विकासको योजना बनाइरहेका स्थानीय तह र जनस्तरबाट भएको प्रचार, प्रसार तथा प्रवर्द्धन प्रशंसनीय रहेको उहाँको भनाइ छ। बोराबाँधको पर्यटन प्रवर्द्धनले अन्य सम्भावनायुक्त गन्तव्यलाई समेत प्रेरणा दिने विश्वास व्यक्त गर्नुभयाे ।

कोशी भ्रमण वर्षका अवसरमा आन्तरिक तथा बाह्य पर्यटकको आगमन बढेकोमा खुसी व्यक्त गर्दै मुख्यमन्त्री कार्कीले बोराबाँध क्षेत्रमा आवश्यक भौतिक तथा आधारभूत संरचना निर्माणमा प्रदेश सरकारको सहयोग रहने स्पष्ट पार्नुभयाे।