दमक– नेकपा एमाले परित्याग गरेर बालेन शाहको टिममा गएका एक युवा २४ घन्टा नबित्दै पुनःपार्टीमै फर्किनुभएको छ। राष्ट्रिय युवा सङ्घ नेपाल दमक नगर कमिटीका सचिव पद छोडेर बालेनलाई जिताउन गएका युवा नेता कमल गैरे २४ घन्टा पनि नबित्दै एमालेमै फर्किनुभएको हाे।

युवा नेता गैरेले सामाजिक सञ्जालमार्फत एमाले अध्यक्ष केपी शर्मा ओलीसँगको तस्वीर सार्वजनिक गर्दै पार्टीमै फर्किएको जानकारी दिनुभएको छ।

नेता गैरेले सामाजिक सञ्जालमा लेख्नुभएको छ, ‘म कमलप्रसाद गैरे विद्यार्थी जीवनदेखि नै एमालेको जनसंगठन अनेरास्ववियु हुँदै राष्ट्रिय युवा सङ्घ नेपाल दमक नगर कमिटीमा सदस्य, उपसचिव र सचिवको भूमिका निर्वाह गर्दै आएको संगठित सदस्य हुँ। विगत लामो समयदेखि पार्टीका विभिन्न गतिविधिहरूमा इमान्दारीपूर्वक संलग्न रहँदै आएको छु।’

हिजो केही व्यक्तिहरूको दबाब र प्रभावमा परी सामाजिक सञ्जालमार्फत पार्टी छोडेको भनेर लेखिएको उहाँले बताउनु भयाे। तर गहिरो सोच, अध्ययन र विश्लेषणपछि नेकपा एमाले मात्र राष्ट्र र जनताको आशा र भरोसाको केन्द्र भएको निष्कर्षमा पुगेको उहाँले बताउनुभएको छ।

‘हिजो भएका गल्ती सच्याउँदै ‘समृद्ध नेपाल, सुखी नेपाली’को राष्ट्रिय आकांक्षा बोकेको यही पार्टीमा हिजो पनि थिएँ, आज पनि यही छु र भोलि पनि यही रहने प्रतिबद्धता व्यक्त गर्दछु।दमक तथा झापा क्षेत्र नम्बर ५ हुँदै समग्र राष्ट्रको विकासका लागि केपी शर्मा ओली नै उपयुक्त नेतृत्व भएको ठहर गर्दै उहाँलाई जिताउन यही पार्टी तथा संगठनमा रही सक्रिय रूपमा लागिरहने संकल्प व्यक्त गर्दछु,’ उहाँले भन्नुभएकाे छ।