काठमाडौं- नेकपा एमालेका सचिव महेश बस्नेतले स्कुले पोसाकमै नाबालकलाई निषेधित क्षेत्रमा पठाएर गरिने गतिविधिलाई आन्दोलन भन्न नमिल्ने टिप्पणी गर्नुभएको छ। उहाँले यस्तो कार्यलाई ‘सुनियोजित हत्या’को संज्ञा दिनुभएको छ।

सामाजिक सञ्जालमार्फत आफ्नो धारणा सार्वजनिक गर्दै सचिव बस्नेतले ‘नयाँ राजनीति’को नारा दिने समूहहरूमाथि कडा आरोप लगाउनुभएको छ। उहाँले बालबालिकालाई राजनीतिक स्वार्थका लागि अगाडि सारेर जोखिमपूर्ण क्षेत्रमा पठाइनु गम्भीर अपराध भएको बताउनुभएको छ।

भदौ २३ गते बालबालिकालाई स्कुल पोसाकमा संसद् भवनमा आक्रमण गर्न पठाएर सुनियोजित हत्याको योजना बनाइएको भन्दै उहाँ राष्ट्रिय स्वतन्त्र पार्टी र बालेन साह प्रति लक्षित गर्नु भएको छ । ‘स्कुले पोसाकमै नाबालकलाई निषेधित क्षेत्रमा पठाउनु आन्दोलन होइन, यो सुनियोजित हत्या हो,’ उहाँले लेख्नुभएको छ, ‘नयाँ राजनीति’को नारा दिनेहरू पीडित होइनन्, बाल मृत्युका योजनाकार र निर्देशक हुन्’, बालेन प्रति लक्षित गर्दै उहाँले लेख्नु भएको छ ।

सचिव बस्नेतले राजनीतिक उद्देश्य पूरा गर्न बालबालिकाको जीवनसँग खेलवाड गर्नु अमानवीय र निन्दनीय कार्य भएको उल्लेख गर्नुभएको छ। उहाँले यस्ता गतिविधिमा संलग्न हुनेहरूलाई कानुनी दायरामा ल्याउनुपर्नेमा पनि जोड दिनुभएको छ।