काठमाडौं-प्रगतिशील लोकतान्त्रिक पार्टी (प्रलोपा) ले रुपन्देही क्षेत्र नम्बर ३ मा नेपाल कम्युनिस्ट पार्टी (एमाले) का उम्मेदवार वासुदेव घिमिरे लाई सघाउने निर्णय गरेको छ।

पार्टीले उक्त क्षेत्रमा एमाले उम्मेदवार घिमिरेलाई मतदान गर्न आफ्ना नेता तथा कार्यकर्ताहरूलाई औपचारिक अपिल जारी गरेको जनाएको छ। प्रलोपाका क्षेत्रीय इन्चार्ज तथा केन्द्रीय सदस्य रविना भण्डारी र केन्द्रीय सदस्य विमला बिकले संयुक्त रूपमा निर्णय सार्वजनिक गर्दै सो जानकारी दिनुभएको हो।

उहाँहरूका अनुसार वर्तमान राजनीतिक परिस्थितिलाई दृष्टिगत गर्दै रुपन्देही–३ मा स्थिरता, विकास र स्पष्ट नीति–कार्यक्रमसहित अघि बढ्न सक्ने उम्मेदवारलाई समर्थन गर्ने निष्कर्षमा पार्टी पुगेको हो। एमाले उम्मेदवार घिमिरेले प्रस्तुत गर्नुभएको विकासको एजेन्डा र क्षेत्रीय प्रतिबद्धतालाई ध्यानमा राखेर सहयोग गर्ने निर्णय गरिएको उहाँहरूको भनाइ छ।

प्रलोपाले जारी गरेको अपिलमा लोकतान्त्रिक मूल्य–मान्यता सुदृढ गर्ने, सुशासन प्रवर्द्धन गर्ने तथा क्षेत्रको समग्र विकास सुनिश्चित गर्ने लक्ष्यलाई प्राथमिकता दिइएको उल्लेख छ। पार्टीले आफ्ना सम्पूर्ण नेता–कार्यकर्ता तथा शुभेच्छुकहरूलाई चुनावी अभियानमा सक्रिय रूपमा सहभागी भई घिमिरेको पक्षमा मतदान गर्न आग्रह गरेको छ।

यस निर्णयसँगै रुपन्देही–३ मा चुनावी समीकरणमा नयाँ आयाम थपिएको विश्लेषण गरिएको छ। विभिन्न दल तथा समूहबीचको सहकार्यले निर्वाचन परिणाममा प्रभाव पार्न सक्ने राजनीतिक वृत्तमा चर्चा छ।

उता एमाले उम्मेदवार घिमिरेले प्रलोपाको समर्थनलाई स्वागत गर्दै लोकतान्त्रिक शक्तिहरूबीच सहकार्य आवश्यक रहेको बताउनुभएको छ। उहाँले रुपन्देही–३ लाई विकास र समृद्धिको मार्गमा अघि बढाउने आफ्नो प्रतिबद्धता दोहोर्‍याउनुभएको छ।

आगामी निर्वाचनलाई लक्षित गर्दै रुपन्देही–३ मा चुनावी गतिविधि तीव्र बन्दै गएको छ। विभिन्न दलका उम्मेदवारहरू मतदातासँग भेटघाट र घरदैलो कार्यक्रममा व्यस्त रहँदा समर्थन र गठबन्धनका निर्णयहरूले चुनावी प्रतिस्पर्धालाई थप रोचक बनाएको छ।