रुपन्देही-बुटवलमा निर्वाचित वडाध्यक्षसहित ५५ जना युवा एमालेमा समाहित भएका छन्। तत्कालीन नेकपा (एकीकृत समाजवादी) बाट बुटवल उपमहानगरपालिका वडा-२ मा वडाध्यक्षमा जितेका सुनिल शाक्यसहितका युवाहरु एमाले फर्किनुभएको हो। ती युवालाई एमाले उपाध्यक्ष तथा रुपन्देही क्षेत्र नं २ मा एमालेका उम्मेदार विष्णु पौडेलले स्वागत गर्नुभयो।

नेपाली कम्युनिष्ट पार्टीलगायतका दलमा आवद्ध युवा नेताहरु पौडेललाई जिताउने अभियानमा सामेल भएको जनाएका छन्। एमालेका युवा नेता तथा रुपन्देही क्षेत्र नं २ निर्वाचन परिचालन समिति सहसंयोजक राजु गुरुङको पहलमा वडाअध्यक्ष शाक्य, युवा नेताहरु शंकर घर्ती, विक्रम बस्याल, सुमन गुरुङ, प्रवेश सुनार, राजु क्षेत्री, आकाश गुरुङ, झविन गौतम, धनसिंह खाम्चालगायत युवाहरु पौडेललाई साथ दिन तयार हुनुभएको हो ।

उनीहरुले यस क्षेत्रको दीर्घकालीन विकास र समृद्धिका लागि विष्णु पौडेलको विकल्प नभएको र भविष्यको प्रधानमन्त्री बन्न सक्ने व्यक्तित्व भएकाले साथ दिन तयार रहेको जनाएका छन्। एमाले उपाध्यक्ष पौडेलको उपस्थितिमा युवा नेता राजु गुरुङले युवाको प्रतिनिधिमूलक भेला गराई उनीहरुलाई यो अभियानमा सामेल गराउनु भएको हो ।

युवाहरुको प्रवेशसँगै रुपन्देही २ मा पौडेलको जित सुनिश्चित भएको भन्दै नेता गुरुङले सामाजिक सञ्जालको भ्रममा नपरी फराकिलो जितका लागि मेहनत गर्नुपर्ने युवालाई निर्देशन दिनुभयो। एमाले परिवारका सदस्यसँग पुनर्मिलन र युवाको साथले आफूलाई थप उत्साहित बनाएको उम्मेदवार पौडेलले बताउनु भयो। आइतबार राति उहाँले ती युवालाई स्वागत गरेको फोटा सार्वजनिक गरेका छन्।