काठमाडौं – पाकिस्तानले अफगानिस्तानको राजधानी काबुलमा रहेको एक लागुऔषध प्रयोगकर्ताहरूको अस्पतालमा गरेको आक्रमण गरेको छ । आक्रमणमा कम्तीमा ४०० जनाको मृत्यु भएको छ । २५० घाइते भएका छन् ।

यो घटना गत महिनाको अन्त्यतिर सुरु भएको द्वन्द्वको अर्को श्रृंखला हो, जहाँ बारम्बार सीमापार झडपका साथै अफगानिस्तानभित्र हवाई आक्रमणहरू भइरहेका छन् । युद्धविरामका लागि गरिएका अन्तर्राष्ट्रिय आह्वानहरूलाई बेवास्ता गरिएको छ ।

पाकिस्तानले अस्पतालमा आक्रमण गरेको आरोपलाई अस्वीकार गरेको छ । पूर्वी अफगानिस्तानमा गरिएका आफ्ना आक्रमणहरूले कुनै पनि नागरिक क्षेत्रलाई निशाना नबनाएको पाकिस्तानले बताएको छ ।

अफगानिस्तानका सरकारी उप–प्रवक्ता हमदुल्लाह फित्रतले एक्समा एक पोस्ट गर्दै स्थानीय समयअनुसार राति करिब ९ बजे गरिएको हवाई आक्रमणले अस्पतालमा क्षति पुर्‍याएको बताएका छन् । उनले दुई हजार बेड क्षमताको उक्त संरचनाका ठूला खण्डहरू ध्वस्त पारेको बताएका छन् । उनले मृत्यु हुनेको संख्या अहिलेसम्म ४०० पुगेको र करिब २५० जना घाइते भएको जानकारी दिएका छन् ।

स्थानीय टेलिभिजनहरूले एक्समा पोस्ट गरेका फुटेजहरूमा सुरक्षा बलहरूले टर्चलाइट प्रयोग गर्दै हताहत भएकाहरूलाई बोकिरहेको र अग्निनियन्त्रकहरूले भवनको भग्नावशेषमा सल्किएको आगो निभाउन संघर्ष गरिरहेको देखिन्छ । फित्रतले उद्धार टोलीहरू आगो नियन्त्रण गर्न र शवहरू निकाल्न खटिरहेको बताएका छन् ।

दुई छिमेकीहरूबीच वर्षौं यताकै घातक लडाइँ तेस्रो हप्तामा प्रवेश गरेको छ । सीमामा दुवै पक्षबीच गोली हानाहान भई अफगानिस्तानमा चारजनाको मृत्यु भएको केही घण्टापछि यो आक्रमण भएको हो ।

अफगान सरकारी प्रवक्ता जबिहुल्लाह मुजाहिदले एक्समा उक्त आक्रमणको निन्दा गर्दै पाकिस्तानलाई आतंक मच्चाउन अस्पताल र नागरिक क्षेत्रहरूलाई निशाना बनाएको आरोप लगाएका छन् ।

“हामी यस अपराधको कडा निन्दा गर्छौं । र, यस्तो कार्यलाई सबै स्वीकृत सिद्धान्तहरूविरुद्ध तथा मानवताविरुद्धको अपराध मान्दछौँ,” उनले पोस्टमा लेखेका छन् ।

यता, पाकिस्तानी प्रधानमन्त्री शहबाज शरिफका प्रवक्ता मोसर्रफ जैदीले यी आरोपहरूलाई निराधार भन्दै खारेज गरेका छन् । उनले काबुलमा कुनै पनि अस्पताललाई निशाना नबनाइएको बताएका छन् ।

अफगान अधिकारीहरूले मृत्युको संख्या सार्वजनिक गर्नुअघि पाकिस्तानको सूचना मन्त्रालयले एक्समा एक पोस्ट गर्दै भनेको छ, “यी आक्रमणहरूले अफगान तालिवान र अफगानिस्तानमा रहेका पाकिस्तानी लडाकूहरूको सैन्य अखडा, प्राविधिक उपकरण भण्डारण तथा गोलाबारुद भण्डारणलगायत आतंकवादी पूर्वाधारहरूलाई काबुल र नान्गहारमा सटिक रूपमा निशाना बनाएका थिए ।”

उक्त स्थान निर्दोष पाकिस्तानी नागरिकहरूविरुद्ध प्रयोग भइरहेको पाकिस्तानको दाबी छ ।

-सीएनएन