काठमाडौं– पूर्वमन्त्री तथा एमाले नेता प्रभु साहले नागरिकतासम्वन्धी अध्यादेशमा रोक लगाउन आदेश गर्ने न्यायाधीशमाथि नै महाअभियोग लगाउनुपर्ने बताउनुभएको छ ।

फेसबुकमा स्टाटस लेख्दै साहले सर्वोच्चको फैसलालाई अप्रत्याशित र गैरजिम्मेवारीपूर्ण भन्दै यसले मुलुकमा संकट निम्त्याउने जिकीर गर्नुभयो । उहाँको भनाइ छ, ‘यो आदेशले नेपाली नागरिकलाई आफ्नै देशमा शरणार्थी बनाउने, जनतामा राज्यप्रति अविश्वास बढ़ाउने र अराजकता फैलाएर मुलुकमा संकट निम्त्याउने भएकोले यसमा संलग्न न्यायाधीशहरुलाई महाअभियोग लगाउन जरुरी छ ।’

संवैधानिक व्यवस्था अनुरूप आएको महत्वपूर्ण अध्यादेश कार्यान्वयनमा रोक लगाउनुले विगतमा सम्मानित सर्वोच्च अदालतको फैसला, विधिको शासन र शक्ति सन्तुलनको सिद्धान्त विपरीत रहेको साहको टिप्पणी छ ।