काठमाडौं– नेकपा एमालेको पुनर्स्थापित केन्द्रीय कमिटीको बैठक सहमतिमै बोलाउन माधव नेपाल समूहको दोस्रो पुस्ताले प्रस्ताव गरेको छ ।

संस्थापनले असार १७ गते केन्द्रीय कमिटी बैठक बोलाउने तयारी गरिरहेकाबेला नेपाल समूहका नेताहरुले एकपक्षीय निर्णयले बैठक नबोलाउन प्रस्ताव गरेको हो । नेकपा एमालेले महाधिवेशन आयोजक कमिटी लगत्तै बिहीबार २०७५ जेठ २ को पार्टी संरचना अनुसारको केन्द्रीय समिति बैठक बोलाउने भएको छ ।

बुधबार आयोजक कमिटी बैठक बस्दैछ ।

नेपाल समूहका एक नेताले नेपाली बहस डट कमसँग भन्नुभयो, ‘एमाले लामो समय फरक समस्याले गुज्रिएकाले सहमति नभई बैठक बोलाउनु हुँदैन । बरु दुई दिन ढिला गरौं दुवै पक्षबीच सहमति गरौं । हार्दिकतापूर्वक बैठक बसौं ।’

असन्तुष्ट समूहका दोस्रो पुस्ताको बैठक निरन्तर बसिरहेको छ । सुरेन्द्र पाण्डे, घनश्याम भूसाल, योगेश भट्टराई, गोकर्ण विष्टलगायतका नेताहरुले मंगलबार पनि नयाँ रणनीति र सहमति प्रयासका लागि छलफल गर्दै हुनुहुन्छ । स्रोतका अनुसार केही दिनयता निरन्तर बसिरहेको उक्त समूहले नेपाल र ओलीको व्यक्तिगत इगोका कारण सहमति हुन नसकेको निष्कर्ष निकालेको छ । त्यसमध्येका एक नेता भन्नुहुन्छ, ‘बुढो भएपछि निहुँ धेरै आउँदोरहेछ नि त ।’

एमाले केन्द्रीय कार्यालयका सचिव शेरबहादुर तामाङले भने बिहीबार दिउँसो १ बजे पार्टी एकता पूर्वको एमाले केन्द्रीय समिति बैठक बोलाउने तयारी भइरहेको जानकारी दिनुभयो । तर, निर्णय आयोजक कमिटीले लिनेछ ।

एमाले स्थायी कमिटी सदस्य सुवास नेम्वाङले बुधबार बोलाइएको आयोजक कमिटीको बैठकको तयारीबारे छलफल गर्न मंगलबार बेलुका ५ बजे स्थायी समिति बैठक बोलाएको जानकारी दिनुभयो ।