काठमाडौं– नेकपा एमालेको केन्द्रीय कमिटी बैठक जारी रहेका बेला पनि एमालेमा माधव नेपाल समूहलाई सहमतिमा ल्याउन संस्थापन पक्षले हदैसम्मको लचकता अपनाएर प्रयास जारी राखेको छ ।

शेरबहादुर देउवालाई प्रधानमन्त्री बनाउन सर्वोच्चमा हस्ताक्षर बुझाएको माधव समूहका सांसदहरुलाई पर्सी सोमबारसम्म हस्ताक्षर फिर्ता गर्न पार्टीले निर्देशन दिएपछि पनि उनीहरुलाई फकाउने क्रम जारी रहेको संस्थापनका एक नेताले जानकारी दिनुभयो ।

ती नेताका अनुसार आज पनि दिउँसो १२ बजे नेताहरुबीच भेटघाट आयोजना गरिएको छ । ‘त्यहाँका केही साथीहरुले दुईतिरै खुटा हाल्नु भएको छ,’ संस्थापनका एक नेताले नेपाली बहस डट कमसँग भन्नुभयो, ‘अबका ७२ घण्टा उहाँहरुलाई सहमतिमा ल्याउने प्रयास हुन्छ । यो समयमा पनि उहाँहरु नआए पार्टीले उहाँहरुलाई पर्खिदैन ।’

सहमतिको प्रयास स्वरुप प्रधानमन्त्री एवं पार्टी अध्यक्ष केपी शर्मा ओलीले पार्टीका सबै कमिटीहरुलाई जेठ २ मा फर्काउने निर्णय गर्नुभएको छ । तर माधव नेपालले नयाँ नयाँ सर्त अघि सारेर सहमतीलाई टाढा धकेलेको उहाँकै समूहका नेताहरुले बताउन थालेका छन् । सहमतिको प्रयास स्वरुप अस्ती बिहीबार साँझ प्रधानमन्त्री ओलीले नेता नेपाललाई टेलिफोन गर्नुभएको थियो । नेताहरु सुवासचन्द्र नेम्वाङ, विष्णु पौडेल र शंकर पोखरेलको उपस्थितिमा राती साढे नौ बजेतिर भएको संवादमा माधव नेपालले अत्यन्त रुखो जवाफ फर्काएको नेताहरुले बताउनुभएको छ । स्वयं प्रधानमन्त्री ओलीले हिजोको बैठकमा माधव नेपालको भनाइ उधृत गर्दै भन्नुभयो, ‘म तपाईंको फोन उठाउनेवाला थिइनँ । साथीहरुले भनेर मात्र उठाएको हुँ । ’

आखिर माधव नेपाललाई आफ्नो पार्टीमा फर्कन के कुराले छेक्यो त ? निकटस्थहरुका अनुसार विपक्षी गठबन्धनलाई दिएको वचन अहिले उहाँलाई गलपासो भएको छ । ‘म कुनै हालतमा धोका दिन्न तपाईं अघि बढ्नुहोस् भनेर नेकपाकालदेखि नै प्रचण्डलाई उत्प्रेरित गर्नुभयो र पार्टीको स्थिति यो भयो,’ एक नेताले भन्नुभयो, ‘अहिले त्यही उत्प्रेरणा शेरबहादुर देउवालाई पनि दिनुभएकोले त्यो चंगुलबाट फुत्किन उहाँलाई मुस्किल परेको छ ।’