काठमाडौं– थारु अगुवाहरूले जेलमा रहेका रेशम चौधरीलाई जनता समाजवादी पार्टी नेपालले राजनीतिक रूपमा प्रयोग गरिरहेको आरोप लगाउनुभएको छ ।
थरूहट थारुवान राष्ट्रिय मोर्चाले ‘टीकापुर थरूहट थारुवान विद्रोहको ६ वर्ष’ विषयमा आयोजना गरेको वृहत अन्तरक्रिया कार्यक्रममा बोल्ने थरूहटका अगुवाहरुले टीकापुरमा भएको आन्दोलनले गर्दा धेरै मन्त्री र सांसद भएपनि थारुको समस्या भने ज्यूँकात्यूँ रहेको आरोप लगाउनुभयो ।
रेशम चौधरी रिहाइ अभियानमा लागेका सुरेन्द्र चौधरीले रेशमको नाममा राजनीति भएको भन्दै आक्रोश पोख्नुभयो । ‘टीकापुर घटनाले गर्दा रेशम चौधरी जेलमा हुनुहुन्छ तर बाहिर उहाँको नाममा राजनीतिक भइरहेको छ,’ उहाँले भन्नुभयो ।
जसपाको महन्थ ठाकुर पक्षले रेशम चौधरीको एजेण्डा बोकेर तत्कालीन केपी ओली सरकारमा सहभागी भए पनि कुनै उपलब्धि हुन नसकेको बताउनुभयो ।
निर्वाचन आयोग जसपा नेपालको आधिकारिकताको मतदान हुँदा रेशम चौधरीको तानातान हुँदा आफूलाई आश्चर्य लागेको पनि बताउनुभयो ।
थारुहरूले शान्तिपूर्ण तरिकाले आफ्नो अधिकार लिन चाहेको भन्दै सुरेन्द्र चौधरीले रेशलाई नछाडिए थारु युवाहरू भूमिगत आन्दोलन गर्न तयार रहेको चेतावनीसमेत दिनुभयो । ‘हामी शान्तिपूर्ण आन्दोलन गर्न चाहन्छौं, तर रेशम चौधरीलाई छाडिएन भने अर्को तरिकाको आन्दोलन गर्न पनि तयार छौँ,’ उहाँले भन्नुभयो ।
थरूहट थारुवान राष्ट्रिय मोर्चाले भदौ १ गतेदेखि सशक्त आन्दोलनमा जाने घोषणा गरेको छ । भदौ १ गतेदेखि माइतीघरमा प्रदर्शन गर्ने र भदौ ६-७ गते विद्रोह दिवस मनाउने घोषणा गरिएको छ ।
प्रतिक्रिया