काठमाडौं– नेकपा एमालेको १०औँ महाधिवेशन अन्तर्गत आव देशैभर एमालेको वडा अधिवेशन हुँदैछ ।

एमाले केन्द्रीय कार्यालयका सचिव शेरबहादुर तामाङका अनुसार बाढी, पहिरो, डुबान र प्राविधिक समस्या देखिएका केही ठाउँ बाहेक देशैभर वडा अधिवेशन हुनेछ । अधिवेशन अगाडि अध्यक्ष केपी शर्मा ओलीले एकसाथ भर्चुअल सम्बोधन गर्दै हुनुहुन्छ । नेट सुविधा भएका वडाहरूको अध्यक्ष ओलीले उद्घाटन गर्ने कार्यक्रम छ ।

‘वडा अधिवेशनको भर्चुअल माध्यमबाट नेट सुविधा भएका वडाहरूको केन्द्रीय अध्यक्षद्वारा उद्घाटन र सम्बोधन गरिनेछ,’ तामाङले नेपाली बहस डट कमसँग भन्नुभयो, ‘यस कार्यको लागि लिंक ५ गते नै पठाइएको छ । यसको लागि सम्भव भए स्क्रिनको व्यवस्थापन गर्ने र यदि सम्भव नभए मोबाइलबाट लिंक जोडेर लाउड स्पिकरमा अधिवेशन परिसरमा अध्यक्षको सम्बोधनलाई जोड्नुपर्नेछ ।’

वडा तथा पालिकाको अधिवेशनको संख्या निर्धारण गर्दा संविधान जारी भएपछि र राज्य पुनर्संरचना भएपछि अधिवेशन आयोजना गरिएको हुनाले यी अधिवेशनहरूलाई प्रथम अधिवेशन मानेर गर्ने एमालेले निर्णय गरेको छ । पार्टीले नेतृत्व चयन गर्दा सकेसम्म सर्वसम्मत विधि अपनाउने र यदि सर्वसम्मत नभएमात्र निर्वाचन विधि अपनाउन पनि भनेको छ ।

९ कात्तिकमा पालिका अधिवेशन हुँदै छ ।