गौरीगञ्ज नेकपा एमालेका अध्यक्ष केपी शर्मा ओली तीनदिने गृहजिल्ला भ्रमणका क्रममा आफ्नो निर्वाचन क्षेत्रका दुईवटा कार्यक्रममा सहभागी हुनुभयो । देहाती गाउँहरुमा आयोजना गरिएका यी कार्यक्रममा ओलीले आफू ३० वर्ष अघि पहिलो पटक चुनाव लड्न यस क्षेत्रमा आएको र यहाँको विकास निर्माणको कुरा स्मरण गर्नुभयो ।

सिमावर्ती गौरीगञ्ज बजारमा आयोजना गरिएको कार्यक्रममा ओलीले आफ्ना पुराना दिन यस क्षेत्रका विकास निर्माणमा आफूले गरेको योगदानका कुरा पनि स्मरण गराउनु भएको छ । गौरीगञ्जबाट रंगेली जोड्ने हुलाकी सडकको पुल झण्डै तीन वर्ष देखि अलपत्र छ । रतुवा खोलामा निर्माणाधिन अवस्थामा रहेको यो पुल नबन्दा यस क्षेत्रका बासिन्दालाई ठूलो मार परेको छ । ओलीले अब यो समस्या लामो समय नरहने आस्वासन दिनुभएको छ । अहिले पुल एकातिर खोलो अर्कातिर छ ।

यही खोलाको भारततिरको भागमा सातवटा पिलर उठाएर खोला साँघुरो पारेर बगाइएको छ । नेपालतर्फ भने नौ वटा पिलरको पुल बनाएर खोलालाई साँघुर्‍याइने उहाँले बताउनुभयो । पुल भन्दा उत्तर तर्फको भागमा खोलाको पूर्व पश्चिम दुवैतर्फ ९ सय मिटर तटबन्धन गरेर खोलालाई पुल भित्र हाल्ने योजना ओलीले स्थानीयबासीलाई सुनाउनु भएको छ ।

ओलीले निर्वाचनका बेला घोषणा गरेको ‘स्मार्ट गौरीगञ्ज सिटी’का बारेमा पनि स्थानीयलाई उत्साहित पार्नु भएको छ । ‘अहिलेको गौरीगञ्जको फोटो खिचेर राख्नुहोस् । केही वर्ष पछि यस्तो गौरीगञ्ज देख्न पाइँदैन । स्मार्ट र आधुनिक गौरीगञ्ज हुनेछ त्यसबेला ।’

हुलाकी सडकको पिच देख्दा यहाँका बासिन्दालाई आफ्नो याद आउनु पर्ने ओलीको भनाइ छ । आफू राष्ट्रिय बहसका विभिन्न बिषयमा केन्द्रित हुनुपर्दा क्षेत्रमा पटक पटक आउन नपाएको उहाँले गौरीगञ्जबासीलाई स्मरण गराउनुभएको छ । तर आफ्नो ध्यान क्षेत्रको विकासमा सधैं रहने गरेको उल्लेख गर्नुभएको छ । ओलीले केही स्थानीयबासिन्दाहरुसँग प्रत्यक्ष भेटघाट र अन्तरक्रिया पनि गर्नुभएको छ ।

गौरीगञ्जमा ओलीले राखेको मन्तव्यको अंश

रतुवा खोला दाँयाबाँयाबाट जादैन । यसलाई छेकेर पुल मुनी हालिन्छ । यो पुल भन्दा भारतले बनाएको पुल सातवटा पिल्लरले बनाइएको छ । त्यति ठाउँमा रतुवा अटेको पनि छ । हामीले ९ वटा पिल्लर बनाएका र्छौं । ९ वटा पिलर मुनीको खाली ठाउँबाट पानी जान सक्दछ । त्यतिमा अटाउँदछ । यसको डिजाइन र निर्माणमा केही कमजोरी हुँदा पुल निर्माणमा ढिलाइ भयो । तपाईंहरुलाई केही असुविधा भयो । तर अब यो समय लामो समय रहँदैन ।

२०५१ सालमा हामीले महिनाको १ सय रुपैयाँबाट सुरु गरेको यो भत्ता आज हामीले दिनको १ सय ३३ रुपैयाँ पुर्‍याएका र्छौं । जसले जसलाई भोट हाले पनि हामी ज्येष्ठ नागरिकहरुलाई बिना भेदभाव भत्ता दिन्छौं ।

तपाईंहरुलाई थाहा छ, म पहिलो पटक प्रधानमन्त्री हुँदा हुलाकी सडक आफैं बनाउछौं भनेर काम सुरु गरें । त्यो आज धेरै प्रतिशत सिद्धिएको छ । केही निकुञ्ज र आरक्षणहरुमा बाँकी छ । अरु ठाउँमा राजमार्ग तयार भएको छ । पिच भइसकेको छ । यहाँ केही ठाउँमा बाँकी होला तर चिन्ता नगर्नुहोस् । यहाँ पनि सबै पिच हुन्छ । पुल पनि बन्छ । यहाँबाट अल्टाबारीको बाटोको माग थियो । त्यो पनि बनिसक्यो होला । गेउरिया र लेडा खोलामा तटबन्धनको माग गर्नुभएको छ साथीहरुले त्यो पनि पुरा हुन्छ ।

अब गौरीगञ्ज सहर पुरानो होइन आधुनिक बन्छ । अब यसलाई पुरानो होइन आधुनिक स्मार्ट सिटी बनाइन्छ । गार्डेन, पार्क, मठ मन्दिर,पोखरी र व्यापारिक कम्प्लेक्स हुन्छन् यहाँ । कलेज अस्पताल हुन्छन् । बिजुलीका तार जमिन मुनीबाट लगिन्छ । त्यस्तो स्मार्ट सिटी हुन्छ । यसको कायाकल्प हुन्छ । अहिलेको गौरीगञ्जको फोटो खिचेर राख्नुहोस् । केही वर्षपछि नयाँ गौरीगञ्ज भइसक्छ । अरु कतिपय आजका झलमल देखिने सहर भन्दा बढी व्यवस्थित,बढी आधुनिक र बढी स्मार्ट हुन्छ ।

म पहिलो पटक २०४८ सालको निर्वाचनमा यहाँ उम्मेदवार भएर आउँदा साथीहरुले पाडाजुँगी गौरीगञ्ज सडक पिचको माग गर्नुभएको थियो । २०५१ सालमा म गृहमन्त्री भएका बेला यहाँको पिच गर्ने प्रक्रिया अघि बढ्यो । आज जिल्लाभरी सडक सञ्जाल । हुलाकी सडक । म पहिलो पटक प्रधानमन्त्री हुँदा सुरु गरेको मदन भण्डारी राजमार्ग अहिले करिब सकिने अवस्थामा पुगेको छ । तपाईंहरुलाई भेट्न आउन ढिला हुँदा म देश निर्माणका काममा लागेको हुन्छु । गरिबहरु जसको फुसको छाना छ, तिनीहरुलाई टिन लाउने अभियानमा लागेको हुन्छु । ज्येष्ठ नागरिकहरुलाई भत्ताको प्रवन्ध गर्न लागेको हुन्छु । २०५१ सालमा हामीले महिनाको १ सय रुपैयाँबाट सुरु गरेको यो भत्ता आज हामीले दिनको १ सय ३३ रुपैयाँ पुर्‍याएका र्छौं । जसले जसलाई भोट हाले पनि हामी ज्येष्ठ नागरिकहरुलाई बिना भेदभाव भत्ता दिन्छौं ।

हामीले मिचिएको भूमि फिर्ता ल्याउने पहल थाल्यौं । त्यसका लागि पहिला दाबी गर्नुपर्‍यो । नक्सा जारी गर्नुपर्‍यो । त्यसलाई संविधानमा राख्नुपर्‍यो । त्यसमा आएका बाधा व्यवधान र चुनौतिको सामाना गर्नुपर्‍यो । नाकाबन्दी हुने अवस्थाबाट देशलाई मुक्त गरियो । चीनबाट बाटो खोलियो । यी सबै काममा लाग्नुपर्दा काठमाडौंमै व्यस्त भएँ । प्रधानमन्त्री हुँदा म धेरै पटक क्षेत्रमा आउन भ्याइनँ । दाजुभाइ दिदी बहिनीले यो कुरा बुझ्नुभएको छ । तर यहाँको हुलाकी बाटो र यहाँका अरु विकास निर्माण देख्दा मलाई सम्झनुहुन्छ । मलाइ देख्नुहुन्छ भन्ने लाग्छ ।