काठमाडौँ–कोशी प्रदेशको मुख्यमन्त्री उद्धव थापाले लिएको विश्वासको मतविरुद्धको रिटमा आजदेखि सर्वोच्च अदालतमा पूर्ण सुनुवाइ हुँदेछ । यसअघि भदौ ७ गते रिटमाथि अन्तरिम आदेश जारी गर्दै सर्वोच्चले सुनुवाइका लागि आज पूर्ण इजलासमा पेशी तोक्न आदेश दिएको थियो ।  

मुख्यमन्त्री थापाले गत भदौ ४ गते विश्वासको मत लिँदा सभाध्यक्ष गरेका कांग्रेस सांसद ईस्राईल मन्सुरीले पनि विश्वासको मत दिएर बहुमत पुर्याएका थिए ।  

त्यसविरुद्ध  पूर्वमुख्यमन्त्री एवं एमाले नेता हिक्मत कार्कीले सर्वोच्चमा मुद्दा दायर गर्नुभएको थियो ।

थापाले प्राप्त गरेको विश्वासको मत संविधानसम्मत नभएको भन्दै दीर्घकालीन तथा नीतिगत निर्णय नगर्न सर्वोच्चले आदेश दिएको थियो । 

यसैबीच तत्कालीन मुख्यमन्त्री कार्कीले अध्यादेशबाट ल्याएको बजेट कार्यान्वयनमा आउन नसकेपछि बजेट शून्यताको अवस्थामा पुगेको छ ।

सभाबाट पारित भई अध्यादेश प्रमाणीकरणका लागि प्रदेश प्रमुखसमक्ष पठाइनुपर्ने भएपनि  सरकारले बजेट अधिवेशन अन्त्य गरेकाले कोशी बजेटविहीन भएको हो ।