काठमाडौँ–नेकपा एमाले लुम्बिनी प्रदेशको नयाँ नेतृत्वका लागि दिउँसो निर्वाचन हुने भएको छ । जारी एमाले लुम्बिनी अधिवेशनमा बिहान १० बजेसम्म उम्मेदवारी दर्ताको समय निर्धारण गरिएको छ । 

उम्मेदवारी दर्ता सकिएपछि अन्य प्रक्रिया हुने र दिउँसो २ बजेदेखि निर्वाचन हुने एमाले लुम्बिनी प्रदेश उपसचिव दुर्गा प्रसाद चौधरीले बताउनुभयो । उहाँले भन्नुभयो, ‘१० बजेसम्म उम्मेदवारी मनोनयनको समय छ । त्यसपछि दाबी विरोध, उम्मेदवारी फिर्ता, अन्तिम नामावली प्रकाशन लगायतका काम हुन्छन् । उम्मेदवारी फिर्ता नभए दिउँसो दुई बजेदेखि निर्वाचन हुन्छ ।’ 

उपसचिव चौधरीले सबै पदका लागि निर्वाचन हुने बताउनुभयो । अध्यक्षमा दुई जनाबीच प्रतिस्पर्धा हुने उहाँले बताउनुभयो । 

अध्यक्षमा राधाकृष्ण कँडेल र हरि रिजालले हिजो राति नै उम्मेदवारी दर्ता गराउनुभएको छ । कँडेल उपाध्यक्ष विष्णु पौडेल र रिजाल महासचिव शंकर पोखरेल निकट मानिनुहुन्छ ।

यस्तै उपाध्यक्षमा भोजप्रसाद श्रेष्ठ र पुजन विश्वकर्मा, सचिवमा लक्ष्मण आचार्य, सोम सापकोटा र उपसचिवमा १२ जनाको उम्मेदवारी परेको बताइएको छ ।

बुटवलको अन्तर्राष्ट्रिय सम्मेलन केन्द्रमा जारी अधिवेशनको एमाले अध्यक्ष केपी शर्मा ओलीले शनिबार उद्घाटन गर्नुभएको थियो । अधिवेशनले २०५ सदस्यीय प्रदेश कमिटी चयन गर्नेछ ।