काठमाडौँ–नेकपा एमाले गण्डकी प्रदेशको नयाँ नेतृत्वका लागि मतदान हुन सकेको छैन । प्रतिनिधिको अन्तिम नामावली प्रकाशन गर्न नसिएपछि मतदानमा ढिलाइ भएको हो । निर्वाचन समितिले आज बिहान ८ बजेदेखि मतदान हुने भनिएको थियो । तर अझै पनि प्रतिनिधिको अन्तिम नामावली प्रकाशन गर्न सकिएको छैन ।
एमाले गण्डकीको अधिवेशनका लागि ९०७ जना प्रतिनिधि चयन हुनुभएको छ । उहाँहरुले अध्यक्ष, उपाध्यक्ष, सचिव, एक महिला उपसचिवसहित १६५ सदस्यीय कार्यसमिति चयन गर्नुहुनेछ । विद्युतीय मतदान हुने भएकाले परिणाम आउन भने समय लाग्ने छैन ।
गण्डकी प्रदेश अध्यक्षका लागि निवर्तमान अध्यक्ष नवराज शर्मा र केन्द्रीय सदस्य मायानाथ अधिकारीको उम्मेदवार परेको छ । उहाँहरू दुवै प्यानलसहित मैदानमा उत्रिनुभएको हो । शर्मालाई एमाले उपमहासचिव पृथ्वीसुब्बा गुरुङ र अधिकारीलाई स्थायी कमिटी सदस्य खगराज अधिकारीले साथ दिनुभएको छ ।
अधिकारीको प्यानलबाट उपाध्यक्षमा बाबुराम विक, सचिवमा रश्मी आचार्य, महिला उपसचिवमा मीना गुरुङ र अर्को उपसचिवमा सन्तोष रावलले उम्मेदवारी दर्ता गराउनुभएको छ ।
अधिकारीलाई एमाले महासचिव शंकर पोखरेलले साथ दिनुभएको छ ।
शर्माको प्यानलबाट उपाध्यक्षमा मीनप्रसाद गुरुङ, सचिवमा धनञ्जय दवाडी, महिला उपसचिवमा मञ्जु अधिकारी र अर्को उपसचिवमा दामबहादुर विकले उम्मेदवारी दर्ता गर्नुभएको छ ।
शर्माको समूहलाई उपाध्यक्ष विष्णु पौडेल, उपमहासचिव गुरुङ, सचिव पद्या अर्याल र स्थायी कमिटी सदस्य किरण गुरुङले साथ दिनुभएको छ ।
प्रतिक्रिया