काठमाडौँ–नेपाल सरकारले सामाजिक सञ्जाल टिकटक बन्द गर्ने निर्णय गर्‍यो । सोमबार बसेको मन्त्रिपरिषद् बैठकले टिकटक बन्द  गर्ने निर्णय गरेको थियो । 

सरकारको टिकटक बन्द गर्ने निर्णयको पक्ष विपक्षमा बहस सुरु भएको छ । सरकारको यो निर्णयमा सत्ता पक्षबाटै विरोध भइरहँदा एमालेमा भने दुई धार देखिएको छ । एमालेका अधिकांश नेताहरूले टिकटक बन्द गर्ने सरकारको निर्णयको विरोध गरिरहँदा महेश बस्नेतले भने स्वागत गर्नुभएको छ । 

नेता बस्नेतले सामाजिक सञ्जालमा पोष्ट गर्दै टिकटक बन्द गर्ने सरकारको निर्णय स्वागतयोग्य रहेको बताउनुभयो । उहाँले अन्य सामाजिक सञ्जाल र युट्युबमा पनि नियमन गर्न सरकारलाई सुझावसमेत दिनुभयो । 

‘नेपालमा टिकटक ब्यान्ड गर्ने सरकारको स्वागतयोग्य निर्णय । अन्य सामाजिक सञ्जाल र युट्युब पनि तत्काल नियमन गरोस् । यो माध्यमबाट अपराध गरिरहेकाहरूलाई कारबाहीको दायरामा ल्याओस्,’ उहाँले भन्नुभएको छ ।

तर अन्य एमाले नेताहरूले भने टिकटक बन्द गर्ने सरकारको निर्णयको विरोध गर्नु भएको छ । 

एमालेका महासचिव शंकर पोखरेलले नियमनका नाममा प्लेटफर्मनै बन्द गर्ने कुरा उचित नभएको बताउनुभएको छ । उहाँले नियमनकारी कानुन बनाउँदा विरोध गर्ने तर नियमनका नाममा छनौट आधारित प्लेटफर्मनै बन्द गर्ने कुरा उचित नभएको टिप्पणी गर्नुभएको छ । 

उहाँले लेख्नुभएको छ, ‘नियमनकारी कानुन बनाउँदा विरोध गर्ने तर नियमनका नाममा छनौट आधारित प्लेटफर्मनै बन्द गर्ने कुरा उचित भएन है । अराजकता र छाडापनका लागि कुनै एक प्लेटफर्मको मात्र प्रयोग भएको छ वा हुन्छ भन्ने कुरा सत्य होइन । कन्टेन आधारित नियमन नै अराजकता र छाडापन रोक्ने उपयुक्त बाटो हो । ध्यान देऊ ।’

यस्तै एमाले नेता तथा प्रतिनिधिसभाका सांसद सूर्य थापाले टिकटक बन्द गर्ने सरकारको निर्णय अलोकतान्त्रिक र परिवर्तनको स्वाभाविक गति रोक्ने तानाशाही निर्णय भएको बताउनुभएको छ । उहाँले संसद्को वर्षे अधिवेशन अन्त्य भएको ११ दिन नबित्दै सरकारले गरेको निर्णय तानाशाही भएको टिप्पणी गर्नुभएको हो ।  

सांसद थापाले विज्ञप्ति जारी  गर्दै  टिकटक, फेसबुक लगायतका सामाजिक सञ्जालहरूलाई कानुनबमोजिम मात्र नियमन गर्न, नेपालमा दर्ता भएर मात्रै सञ्चालन गर्ने व्यवस्था मिलाउन र करको दायरामा ल्याउन माग गर्नुभयो ।

यस्तै नेता गोकुल बास्कोटाले पनि सरकारको टिकटक बन्द गर्ने निर्णयमा असहमति जनाउनुभएको छ । उहँले लेख्नुभएको छ, ‘सरकारले टिकटक बन्द गर्ने निर्णय लिएछ । स्वस्थ व्यक्तिगत मनोरञ्जन, सृजनात्मक काम गर्न पाउने र क्टेन्ट फिल्टर गर्ने कानुन बनाएर सो प्लेटफर्मले नेपालको आर्थिक कानुन मान्ने बनाएको भए हुन्थ्यो । तर बन्दै गरिदिँदा गगन–विश्व र प्रचण्डलाई लोकतन्त्र खतरामा परेको नलागेमा मेरो आपत्ति रहेन !’ 

एमाले उपमहासचिव विष्णु रिमालले टिकटक बन्द नभई नियमन गर्न आग्रह गर्नुभएको छ । उहाँले लेख्नुभएको छ, ‘सरकार—कन्टेन्ट ‘ब्लक’ गर्ने हैन, नियमन गर । छनौट आधारित प्लेटफर्म मात्र बन्द गर्ने हैन, अभिव्यक्तिमा नियन्त्रण पनि हैन, त्यसमा रहेको अराजकतामा नियन्त्रण गर !’

यस्तै एमाले नेता विष्णु रिजालले सामाजिक सञ्जाल बन्द गर्दैमा समस्याको समाधान नहुने बताउनुभएको छ । उहाँले बन्द भन्दा पनि नियमन गर्न आवश्यक रहेको तर्क गर्नुभयो । उहाँले लेख्नुभएको छ,’टिकटक, फेसबुक, एक्स जस्ता सामाजिक सञ्जाल नेपालमा दर्ता गर्ने र कार्यालय राख्ने व्यवस्था गर्नुपर्छ, जसबाट अवाञ्छित सामाग्री नियन्त्रण गर्न सकियोस् र राजश्वमा पनि योगदान पुगोस् । यिनको नियमन अति जरुरी छ । तर, बन्द गरेर समाधान सम्भव छैन । यस निर्णयबाट सरकार पछि नहटी सुखै छैन ।’

नेपाल दूरसञ्चार प्राधिकरणले टिकटक बन्द गर्न इन्टरनेट सेवा प्रदायक संस्थाहरूलाई निर्देशन समेत दिएको छ ।