काठमाडौँ– नेकपा एमालेका अध्यक्ष केपी शर्मा ओली आज झापा जाँदै हुनुहुन्छ । एमाले झापा जिल्लाको अधिवेशन उद्घाटनका लागि अध्यक्ष ओली आज झापा जान लाग्नुभएको हो । 

एमाले झापाको जिल्ला अधिवेशन भोलिदेखि सुरु हुँदैछ । अधिवेशनको तयारी पुरा भएको र भोलि अध्यक्ष ओलीले उद्घाटन गर्ने कार्यक्रम रहेको एमाले नेता शिव ढुंगेलले जानकारी दिनुभयो । 

अधिवेशनका लागि प्रतिनिधि छनौट लगायतका सबै काम सकिएको उहाँले बताउनुभयो । अधिवेशनबाट सर्वसहमत नेतृत्व चयन गर्ने तयारी रहेको बताइएको छ । सर्वसहमत हुन नसके निर्वाचनबाट नयाँ नेतृत्व चयन गरिने एमाले झापाले जनाएको छ । 

आज अध्यक्ष ओलीसँग छलफल भएपछि सर्वसहमत कि निर्वाचनबाट नेतृत्व छनौट गर्ने भन्ने टुंगो लाग्ने नेता ढुंगेलले बताउनुभयो ।