काठमाडौँ-सरकारले राजावादीको अराजक र हिंसात्मक  प्रदर्शनमा सहभागी नहुन अपिल गरेको छ।

सोमबार बसेको मन्त्रिपरिषद् बैठकको निर्णय सार्वजनिक गर्दै सरकारका प्रवक्ता समेत रहेका सूचना तथा प्रविधिमन्त्री पृथ्वीसुब्बा गुरुङले राजावादीको अराजक प्रदर्शनमा सहभागी नहुन आम सर्वसाधारणलाई अपिल गर्नुभएको हो।

‘तीनकुने घटनाको सत्यतथ्य छानिवनि गरी दोषीउपर कारबाही गर्न र अगामी दिनमा यस किसिमको घटना हुन नदिने व्यवस्था मिलाउन गृह मन्त्रालयलाई निर्देशन दिइएको छ,’ मन्त्री गुरुङले भन्नुभयो, ‘साथै, यस किसिमको अराजक गतिविधिहरूमा संलग्न नहुन आम नागरिकहरुमा नेपाल सरकार हार्दिक अपिल गर्दछ।’

मन्त्री गुरुङले तीनकुनेमा चैत १५ गते शुक्रबार राजावादीले गरेको हिंसात्मक प्रदर्शनको बैठकले निन्दा गरेको जानकारी दिनुभयो। यस्तै घटनामा घाइते भएकाहरूको उपचारको व्यवस्था मिलाउन स्वास्थ्य तथा जनसंख्या मन्त्रालयलाई जिम्मेवारी दिने निर्णय बैठकले गरेको पनि मन्त्री गुरुङले जानकारी दिनुभयो।

चैत १५ गतेशुक्रबार काठमाडौँको तीनकुनेमा राजावादीले प्रदर्शन गरेका थिए। प्रदर्शन हिंस्रक हुँदा एक पत्रकारसहित दुई जनाले ज्यान गुमाएका थिए भने केही निजी र सरकारी सम्पत्ति तोडफोड तथा आगजनी गरिएको थियो।