काठमाडौं, दोलखाबाट प्रतिनिधिसभा सदस्य उम्मेदवार बन्नुभएका नेकपा एमालेका नेता, पूर्व सञ्चार मन्त्री पार्वत गुरुङले आगामी फागुन २१ गते हुने प्रतिनिधिसभा निर्वाचनको तयारी र राजनीतिक भेटघाटलाई तीव्रता दिनुभएको छ ।

यसैक्रममा गुरुङले एमाले बिगु–काठमाडौं सम्पर्क मञ्चको बैठकमा सहभागिता जनाउँदै निर्वाचन केन्द्रित रणनीतिबारे छलफल गर्नुभएको छ । बैठकमा चुनावी अभियान सञ्चालन, युवा परिचालन तथा काठमाडौं उपत्यकामा रहेका दोलखाका मतदातालाई मतदानमा सहभागी गराउने उपायबारे विस्तृत चर्चा गरिएको छ ।

गुरुङले आगामी निर्वाचनमा पार्टीलाई विजयी गराउन संगठनात्मक एकता, सक्रिय कार्यकर्ता परिचालन र मतदातासँग प्रत्यक्ष सम्पर्कलाई प्राथमिकतामा राखेर अघि बढ्नुपर्ने आवश्यकता औँल्याउनुभयो । उहाँले दोलखाको विकास, पूर्वाधार विस्तार र स्थानीय जनताको अपेक्षा सम्बोधन गर्ने एजेन्डाका साथ निर्वाचनमा जाने प्रतिबद्धता समेत व्यक्त गर्नुभएको छ ।

बैठकमा सहभागी नेताहरूले काठमाडौं उपत्यकामा रहेका दोलखाका मतदाताबीच समन्वय र अभियानलाई थप सशक्त बनाउने  र काठमाडौंमा रहेका मतदातालाई मतदानको लागि गाउँसम्म पुर्‍याउन समन्वय गर्ने निर्णय गरेको जनाइएको छ ।