जाजरकोट-जाजरकोटमा बोलेरो जिप दुर्घटना हुँदा एक युवकको मृत्यु भएको छ भने ६ जना घाइते भएका छन्।

बिहीबार साँझ नलगाड नगरपालिका-७ दानेपिपलमा लु.१ च ८२२७ नम्बरको बोलेरो जिप दुर्घटनामा परेको हो। डोल्पा–जाजरकोट सडकखण्डअन्तर्गत नलगाड नगरपालिका-९ ताँत्राबाट दल्लीतर्फ आउँदै गरेको जिप अनियन्त्रित भई सडकबाट तल खसेको जिल्ला प्रहरी कार्यालय जाजरकोटले जनाएको छ।

दुर्घटनामा नलगाड नगरपालिका-१० का २५ वर्षीय बालकृष्ण बोहराको मृत्यु भएको हो। दुर्घटनामा घाइते भएका बोहरालाई नगर अस्पताल दल्लीमा प्रारम्भिक उपचारपछि थप उपचारका लागि प्रदेश अस्पताल कालागाउँ, सुर्खेत रिफर गरिएको थियो। अस्पताल लैजाँदै गर्दा बाटोमै उनको मृत्यु भएको जिल्ला प्रहरी कार्यालय जाजरकोटका सूचना अधिकारी प्रहरी निरीक्षक सुधीरकुमार खड्काले जानकारी दिए।

दुर्घटनामा नलगाड-१० का २६ वर्षीय गणेश ध्यार, २६ वर्षीय मानबहादुर बोहरा, ४० वर्षीया सम्झना गहतरा, ३० वर्षीय राजेन्द्र ध्यार, ५२ वर्षीया रत्नाकुमारी बोहरा र १६ वर्षीय निखिल सुनार घाइते भएका छन्। उनीहरूको नगर अस्पताल दल्लीमा उपचार भइरहेको प्रहरीले जनाएको छ।

दुर्घटनापछि प्रहरीले जिप चालक नलगाड नगरपालिका–८ हलचौरका २४ वर्षीय विनोद विकलाई नियन्त्रणमा लिएको छ। प्रहरीले घटनाबारे थप अनुसन्धान गरिरहेको जनाएको छ।