काठमाडौं-प्रधानमन्त्री केपी शर्मा ओलीले बहिनीहरू हातबाट भाइटिका ग्रहण गर्नुभएको छ।

बहिनीहरू विष्णुमाया ढकाल, कौशिला कोइराला र विष्णु ओलीबाट प्रधानमन्त्री ओलीले भाइटिका लगाउनुभएको हो । उहाँले आइतबार बिहान ११ बजेर ३७ मिनेटको शुभ साइतमा विधिपूर्वक तिहारको टीका ग्रहण गर्नुभएको उहाँको सचिवालयले जनाएको छ ।
प्रधानमन्त्रीको निजी निवास बालुवाटारमा बहिनीहरूले ओलीलाई टीका लगाइदिनुभएको हो । बहिनीहरूले टीका लगाइदिएपछि ओलीले पनि बहिनीहरूलाई टीका लगाइदिनु भएको थियो ।

नेपाल पञ्चाङ्ग विकास निर्णायक समितिले भाइटिकाको उत्तम साइत बिहान ११ बजेर ३७ मिनेटमा निकालेको थियो । यद्यपि समितिले दिनभर नै टीका लगाउन सकिने जनाएको छ ।
यमपञ्चकको अन्तिम दिन आज दिदीबहिनीले दाजुभाइलाई र दाजुभाइले दिदीबहिनीलाई टीका लगाउने प्रचलन छ । भाइटिका लगाएसँगै पाँचदिनको यमपञ्चक सकिएको छ ।