महोत्तरी-स्थानीय तह उपनिर्वाचन अन्तर्गत वडाध्यक्षको लागि रामगोपालपुर-२ मा निर्धारित समयमा मतदान जारी छ। वडाको मोहनपुरस्थित नेपाल राष्ट्रिय आधारभूत विधालयको मतदानस्थलमा बिहानैदेखि मतदाताको लाम लागेको छ। मतदान कार्यक्रममा मतदाताहरूको उत्साहजनक उपस्थिति रहेको छ।

मतदानस्थलबाट जिल्ला निर्वाचन अधिकारी रञ्जिता झाले जनाएअनुसार अहिलेसम्म कूल मतदाताको ३० प्रतिशत अर्थात ६४५ जनाले मतदान गरेका छन्। 

रामगोपालपुर २ मा २१ सय ४१ मतदाता रहेका छन्। जसमा ९४० महिला मतदाता छन्। मतदान केन्द्र (क) मा ३६८ र (ख) मा २७७ जनाले मत खसालेका छन्। उपनिर्वाचन भइरहेको वडा २ मा ९४० महिलासहित दुई हजार १४१ जना मतदाता रहेको उहाँले बताउनुभयो। 

रामगोपालपुर २ का वडाध्यक्ष मुकेश यादवको भदौ ९ गते मोटर साइकल दुर्घटनामा मृत्यु भएका कारण उपनिर्वाचन हुन लागको हो। उपनिर्वाचनमा ८ राजनीतिक दल र १० स्वतन्त्र गरी १८ उम्मेदवार प्रतिस्पर्धामा छन्।