काठमाडौं– नेकपा एमालेको १०औं राष्ट्रिय महाधिवेशनमा राष्ट्रिय सहकारी बैंकका अध्यक्ष समेत रहनुभएका पुराना नेता केबी उप्रेतीले पनि केन्द्रीय सदस्यमा उम्मेदवारी घोषणा गर्नुभएको छ ।

६३ लाख भन्दा बढी सहकारीका सदस्यहरुको नेतृत्व गर्ने राष्ट्रिय सहकारी बैंकका अध्यक्ष उप्रेतीले नेपाली बहस डट कममार्फत उम्मेदवारी घोषणा गर्नुभएको हो ।

एमालेको केन्द्रीय सहकारी तथा गरीबी निवारण विभागका सचिव समेत रहनुभएका उप्रेतीले सहकारी क्षेत्रका समस्याको समाधानका लागि नीतिगत तहमै रहनुपर्ने भन्दै केन्द्रीय सदस्यमा उम्मेदवार बन्ने बताउनुभएको हो । उप्रेती खुला तर्फको केन्द्रीय सदस्यको उम्मेदवार बन्नुभएको छ ।

दुई सय जनाभन्दा बढी सहकारीकर्मी नै महाधिवेशन प्रतिनिधि भएकाले आफूले खुलातर्फ केन्द्रीय सदस्य बन्न चाहेको उप्रेतीले बताउनुभयो ।

उप्रेतीको परिचय

दोलखाको नाम्दुमा २०१७ साल असार १० गते जन्मिनुभएका के.बी. उप्रेती (कृष्णबहादुर उप्रेती) २०३५/०३६ बाट विद्यार्थी आन्दोलनमा होमिएर राजनीतिमा लाग्नुभएको हो । २०४५ सालमा पिपुल्स क्याम्पसमा अनेरास्ववियूको तर्फबाट स्ववियू सभापति बन्नुभएका उप्रेतीले जनआन्दोलन र त्यसपछिको आम निर्वाचनमा नेतृत्वदायी भूमिका निर्वाह गर्नुभएको छ ।

अनेरास्ववियुका तत्कालीन अध्यक्ष शंकर पोखरेलको नेतृत्वमा निजी क्याम्पस स्ववियु काउन्सिललाई स्ववियु काउन्सिलमा एकीकरण गराएपछि शंकर पोखरेलको अध्यक्षतामा रहेको स्ववियु काउन्सिलको कोषाध्यक्ष भएर उप्रेतीले काम गर्नुभएको थियो ।

२०४७ मा एमालेको संगठित सदस्य बनेका उप्रेतीले पार्टीको शाखा कमिटी सचिव, इलाका कमिटि सचिव हुँदै काठमाडौं विशेष जिल्ला कमिटिको सदस्य र सचिव भएर जिम्मेवारी निर्वाह गर्नुभएको थियो । उहाँले तत्कालीन काठमाडौं क्षेत्र नम्बर ५ लाई कार्यक्षेत्र बताउनुभएको थियो ।

केन्द्रीय सम्पर्क विभागको सदस्य हुँदै पछिल्लो समय एमालेको केन्द्रीय सहकारी तथा गरीबी निवारण विभागमा रहनुभएका उप्रेती दुई कार्यकाल विभागको सदस्य हुँदै हाल सचिव हुनुभएको छ । उप्रेती अहिले विभागका तर्फबाट नेकपा एमालेको दशौं राष्ट्रिय महाधिवेशन प्रतिनिधि चयन हुनुभएको छ ।