काठमाडौँ-राष्ट्रिय सभाको उपाध्यक्ष पदको निर्वाचनका लागि दुईजनाको उम्मेदवारी परेको छ। 

सत्तारूढ दल एमालेबाट  सांसद विमला घिमिरे र प्रमुख प्रतिपक्षी कांग्रेसबाट  सांसद विष्णुदेवी पुडासैनीले मात्र मनोनयन दर्ता गराएका हुन्।

चैत २८ गते हुने निर्वाचनका लागि आज १:४५ बजेसम्म मनोनयन दर्ताको समय तोकिएको थियो। एमाले उम्मेदवार घिमिरेको प्रस्तावकमा एमालेकै भगवती न्यौपाने र समर्थकमा माओवादीका गोपीबहादुर सार्की अछामी छन्। उता कांग्रेस उम्मेदवार पुडासैनीको प्रस्तावकमा कांग्रेसकै दुर्गाकुमारी गुरुङ र समर्थकमा कांग्रेसकै नारायणदत्त भट्ट छन्। 

एमालेको तर्फबाट उम्मेदवारी दिनुभएको घिमिरेलाई सत्ता गठबन्धनको साथ भएकाले जित निश्चित छ। यद्यपि, गठबन्धनमा आवद्ध माधव नेपाल नेतृत्वको नेकपा एसले पनि उपाध्यक्षको भाग आफ्नो पार्टीले पाउनुपर्ने दाबी गरेको थियो । तर, आफ्नो भागमा नपर्ने भएपछि उम्मेदवारी पनि नदिइएको नेकपा एसका एक नेताले जानकारी दिनुभयो ।

माओवादी केन्द्रका १७, नेकपा एमालेका वामदेव गौतमबाहेक ९, नेकपा एसका ८ र जसपाका ४ सांसद छन् । ५८ जना सदस्य कायम रहेको राष्ट्रिय सभा उपाध्यक्ष जित्नका लागि ३० जना सांसद चाहिन्छ।

उर्मिला अर्यालले राजीनामा दिएपछि रिक्त उपाध्यक्ष पदमा निर्वाचन गर्न लागिएको हो।