काठमाडौं-साउदी अरेबियाको सरकारी तेल कम्पनी साउदी अरामको ‘सायबाह’ तेल क्षेत्रमा भएको ड्रोन आक्रमणमा परी एक नेपाली नागरिकको ज्यान गएको छ।

परराष्ट्र मन्त्रालयले बिहीबार सामाजिक सञ्जाल ‘एक्स’मार्फत घटनाको पुष्टि गर्दै नेपाली नागरिकको असामयिक निधनप्रति गहिरो दुःख व्यक्त गरेको हो।

मन्त्रालयका अनुसार बुधबार सायबाह तेल क्षेत्रलाई लक्षित गरी प्रहार गरिएको ड्रोनलाई साउदी सुरक्षा प्रणालीले आकाशमै नष्ट गर्दा त्यसका भग्नावशेष खसेर ती नेपाली कामदारको दुःखद् निधन भएको हो।

मन्त्रालयले मृतकका शोकसन्तप्त परिवारजनप्रति हार्दिक समवेदना प्रकट गर्दै घटनामा घाइते भएकाहरूको शीघ्र स्वास्थ्यलाभको कामना गरेको छ । साथै, सर्वसाधारण नागरिक र महत्त्वपूर्ण पूर्वाधारहरूलाई लक्षित गरी गरिने जुनसुकै प्रकारका आक्रमणको नेपालले स्पष्ट शब्दमा निन्दा गर्ने मन्त्रालयले दोहोर्‍याएको छ।

आफ्नो सैद्धान्तिक अडानलाई पुनः दोहोर्‍याउँदै नेपालले संवाद, वार्ता र कूटनीतिक माध्यमबाटै जुनसुकै विवादको शान्तिपूर्ण समाधान खोज्न समेत सम्बद्ध पक्षहरूलाई आह्वान गरेको छ।

अन्तर्राष्ट्रिय सञ्चारमाध्यमहरूका अनुसार साउदी अरेबियाको पूर्वी प्रान्तमा अवस्थित उक्त तेल क्षेत्रमा भएको सो घटनामा एक नेपाली र एक फिलिपिनो नागरिकको मृत्यु भएको छ भने एक भारतीय र एक पाकिस्तानी नागरिक घाइते भएका छन् ।

मृतक नेपालीको विस्तृत परिचय खुलाइएको छैन ।

पछिल्ला केही हप्तायता यमनका इरान समर्थित हुथी विद्रोहीहरूले साउदी अरेबियाका विमानस्थल र ऊर्जा पूर्वाधारहरूलाई लक्षित गरी शृङ्खलाबद्ध आक्रमणहरू गर्दै आएका छन्।