काठमाडौं- खोटाङको हलेसी तुवाचुङ नगरपालिकाले काठमाडौँबाट विस्थापित आफ्नो नगरपालिकाका नागरिकलाई आवासको व्यवस्था गरिदिने भएको छ।

काठमाडौँ उपत्यकाका सुकुमवासी वस्तीमा संघीय सरकारले डोजर चलाएपछि विस्थापित भएका आफ्नो नगरपालिकाका नागरिकलाई आफ्नै ठाउँमा फर्किए आवासको व्यवस्थापनमा सहयोग गर्ने नगरपालिकाकी मेयर बिमला राईले बताइन्।
बुधबार बसेको हलेसी तुवाचुङ नगर कार्यपालिकाको बैठकले आफ्नो गाउँ फर्किन इच्छुक तर आफ्नै ठाउँमा जग्गा भए पनि बसोबासको लागि घर नभएका परिवारलाई आवास निर्माणमा सहयोग गर्ने निर्णय गरेको हो।

आफ्नै माटोमा सम्मानपूर्वक जीवन यापन गर्न पनि नगरपालिकाले आह्वान गरेको छ। संघीय सरकारले सुकुम्वासी बस्तीसहित देशभरका सरकारी जग्गा खाली गराउने अभियान चलाएको छ।