परासी -करिब ६ महिनासम्म नेकपा समाजवादीमा बसेर यहाँको नेकपा समाजवादीको ठूलो समुह एमालेमा फर्किएको छ । माधव नेपालको लहै लहैमा लागेर आफूहरुले मुल घर छोडेकोमा पछुतो मान्दै उनीहरु सबै एमालेमा फर्किएका हुन् ।
नेकपा (एस)को लुम्बिनी प्रदेश कमिटी सदस्य खगेश्वर पन्थी देखि अनेम संघ केन्द्रीय सदस्य सरिता पौडेलसम्म र नगर कमिटी सदस्य पार्वती केवट देखि अनेकिसंघका केन्द्रीय सदस्य भगौती प्रसाद यादवसम्म एमालेमा प्रवेश गरेका छन् । उनीहरु सबैको भनाइ छ ‘आफ्नै घर फर्कि आयौं ।
समाजवादीको रामग्राम नगर कमिटी अध्यक्ष रामप्रसाद पौडेल सहित सिंगो कमिटी नै एमालेमा प्रवेश गरेको छ । उनीहरुले विज्ञप्ती जारी गरेर समाजवादी पार्टीको नगर कमिटी र अन्य जनवर्गीय संगठनका कमिटीहरु पनि एमालेमा समाहित भएको उल्लेख गरेका छन् ।
प्रवेशीहरुका तर्फबाट जारी गरिएको संयुक्त विज्ञप्तीमा विशेष परिस्तिीमा आफूहरुले पार्टी छोडेको तर छोटो समयमा नै आफ्नो घर फर्किआएको उल्लेख गरिएको छ ।