काठमाडौं– गण्डकी सरकार बनाएको दुई महिना नबित्दै माओवादी केन्द्रले कांग्रेससँग बेखेडा झिक्न सुरू गरेको छ ।

कांग्रेस, माओवादी र जनमोर्चा मिलेर एमाले सरकार ढालेपछि अहिले त्यहाँ कांग्रेसका तर्फबाट त्यहाँ कृष्णचन्द्र नेपाली मुख्यमन्त्री हुनुहुन्छ । तर, माओवादीको केन्द्रीय कमिटी बैठकमा गोरखाका नेता हितराज पाण्डेले मुख्यमन्त्री पद आलोपालो हुनुपर्ने माग अघि सार्नु भएको छ ।

‘गण्डकीको चुनावमा हाम्रो प्रतिस्पर्धा कांग्रेससँग हुन्छ । त्यसैले पूरै कार्यकाल उसैलाई चलाउन दिएर पार्टीलाई कमजोर र कांग्रेसलाई बलियो बनाउन सकिँदैन,’ नेता पाण्डेले बैठकको समूहगत छलफलमा भन्नुभएको थियो ।

यसका लागि पाण्डेले लुम्बिनीको सहमतिलाई नजिर बनाउनुभएको छ । लुम्बिनीमा माओवादी र कांग्रेस आधाआधा कार्यकाल मुख्यमन्त्री सञ्चालन गर्ने सहमति छ ।

आधा कार्यकालको एजेण्डा अब गण्डकी प्रदेशमा औपचारिक रूपमा उठाउने माओवादीको तयारी छ । ‘लुम्बिनी र गण्डकीमा आफूले आधा कार्यकाल लिने, कर्णालीमा कांग्रेसलाई छोडिदिने अनि संघीय सरकारमा देउवालाई पनि यही नियम लगाउन मनोवैज्ञानिक दबाब दिने माओावदी रणनीति हो यो,’ एक स्थायी कमिटी सदस्यले भन्नुभयो ।