काठमाडौं– काठमाडौंमा आएर एमालेको दसौँ महाधिवेशनको नेतृत्वमा ४० प्रतिशत युवा प्रतिनिधित्व गराउने अभियान छेड्नुभएका बागलुङका युवा नेता हिरा केसीले केन्द्रीय सदस्यमा उम्मेदवारी घोषणा गर्नुभएको छ ।
पार्टीमा केन्द्रीय समितिदेखि वडासम्म जिम्मेवारी हस्तान्तरणको कुनै मापदण्ड नभएको अवस्थामा युवाहरूले पार्टीलाई चलायमान बनाउन जिम्मेवारी हस्तान्तरणको मापदण्ड बनाउन भन्दै केसीले बहस सुरु गर्नुभएको थियो ।
केसीको नेतृत्वमा सातै प्रदेशका युवाहरुको भेला भएको थियो ।
युवा संघ नेपालका पूर्वउपाध्यक्षसमेत रहनुभएका केसीले बागलुङलाई केन्द्र बनाएर अभियान चलाइरहनुभएको छ ।
केसीले सबै प्रदेशका युवा नेताहरू मिलेर जिम्मेवारी हस्तान्तरणको मापदण्ड बनाउन पार्टी नेतृत्वदेखि पदाधिकारीसम्म ध्यानाकर्षण गराउनुभएको थियो ।
केसीले एमालेमा चारपटक केन्द्रीय सदस्य भएका नेताहरुलाई पदाधिकारी रोज्न वा अवकास लिन अपिल गर्नुभएको थियो । अहिलेजस्तै ७० वर्षसम्म केन्द्रीय सदस्य भइरहने विद्यमान अवस्था कायम रहे एमालेमा युवाहरुको प्रतिनिधि शुन्य हुने उहाँको भनाइ छ ।
नवौं महाधिवेशनमा कुनै प्यानल नरोजी उम्मेदवार हुनुभएका केसीले आफ्नो एजेन्डा दसौं महाधिवेशनमा पूरा भएको बताउनुभयो । दसौं महाधिवेशनमा बिना प्यानल उम्मेदवारी दिन पाउँदा आफ्नो विजय सुनिश्चित भएको उहाँको भनाइ छ ।
केसीको अभियानमा साथ दिने युवाहरुले नारा नै बनाएका छन्, ‘गण्डकीको हिरा, एमालेको मोती, केन्द्रीय सदस्य उम्मेदवार हिरा केसी ।’
प्रतिक्रिया