नेपालगञ्ज- निर्वाचनको बेला तीनवर्ष भित्र वीरेन्द्रनगरबासीलाई खानेपानी उपलब्ध गराउने प्रतिवद्धता व्यक्त गरेकी नगरप्रमुख मोहनमाया ढकालले आज भेरी लिफ्ट खानेपानी आयोजना निर्माणका लागि सम्झौता पत्रमा हस्ताक्षर गर्नु भएको छ ।
नेपालगञ्जमा आयोजना भएको एक कार्यक्रममा वीरेन्द्रनगर नगरपालिकाका प्रमुख ढकाल र खानेपानी तथा ढल निकास विभागका महानिर्देशक रमकान्त दवाडीबीच आज सम्झौता पत्रमा हस्ताक्षर भएको छ ।
नेकपा एमाले वीरेन्द्रनगरले चुनावी घोषणा पत्रमा तीनवर्ष भित्र भेरी लिफ्ट आयोजना निर्माण सम्पन्न गरी उपत्यकाबासीलाई शुद्ध खानेपानी उपलब्ध गराउने प्रतिवद्धता व्यक्त गरेको थियो । ‘उपत्यकाको ठूलो समस्याको रुपमा रहेको खानेपानी अब केही वर्ष भित्रै निराकरण हुनेछ । हामीले एउटा बृहत खानेपानी योजनामा हस्ताक्षर गरेका छौं ’ ढकालले भन्नुभयो ‘यो योजना सफल पार्न नगरपालिका अहोरात्र खट्नेछ ।’

नेपालगञ्जमा विभिन्न नगरपालिकासँग खानेपानी तथा सरसफाइ मन्त्रालय,प्रदेश जलस्रोत तथा उर्जा मन्त्रालय र खानेपानी तथा ढल निकास विभागले आजै सम्झौता गरेका छन् । सम्झौतामा हस्ताक्षर गर्ने कार्यक्रममा खानेपानी तथा सरसफाइ मन्त्रालयका सचिव मणीराम गेलाल,प्रदेशका सचिव देवराज निरौला र महानिर्देशक रमाकान्त दवाडी हुनुहुनथ्यो । यस्तै नगरपालिकाको तर्फबाठ प्रमुख ढकाल,प्रमुख प्रशासकीय अधिकृत नुरहरी तिवारी र वीरेन्द्रनगर उपत्यका खानेपानी आयोजनाका अध्यक्ष कुलमणी देवकोटा उपस्थित हुनुुहन्थ्यो ।

करिब ६ वर्षमा सम्पन्न गर्ने लक्ष्य राखिएको यो अयोजना दुई चरणमा सञ्चालन हुनेछ । ढकालका अनुसार पहिलो तीन वर्षमा पहिलो चरणको पानी विरतण हुनेछ । दोस्रो तीनवर्षमा योजना पूर्ण रुपमा सञ्चालन हुनेछ । आयोजना सम्पन्न गर्न करिब ६ अर्व रुपैंया लगानी हुनेछ ।