काठमाडौं-राष्ट्रपतिले पदमुक्त गरेका जसपाका चार मन्त्रीको कार्यभार प्रधानमन्त्री शेरबहादुर देउवाले सम्हाल्ने हुनुभएको छ । राष्ट्रपतिले पदमुक्त गरेका सङ्घीय मामिला तथा सामान्य प्रशासन मन्त्री राजेन्द्रप्रसाद श्रेष्ठ, कृषि तथा पशुपक्षी विकास मन्त्री मृगेन्द्रकुमार सिंह यादव, भौतिक पूर्वाधार तथा यातायात मन्त्री मोहम्मद इश्तियाक राई र वन तथा वातावरण मन्त्री प्रदीप यादवले सम्हाली आएको मन्त्रालयहरूको कार्यभार प्रधानमन्त्री देउवाले सम्हाल्ने गरी तोकिएको छ ।

यस्तै कानुन न्याय तथा संसदीय मामिला मन्त्रालयको कार्यभार सञ्चार तथा सूचना प्रविधि मन्त्री ज्ञानेन्द्रबहादुर कार्कीले सम्हाल्ने हुनुभएको छ । गोविन्दप्रसाद शर्मा (कोइराला) को पदावधि सकिएसँगै प्रधानमन्त्री देउवाले सो जिम्मेवारी कार्कीलाई दिनुभएको हो ।

राष्ट्रपतिको कार्यालयबाट जारी विज्ञप्तिमा भनिएको छ, ‘सम्माननीय राष्ट्रपति विद्यादेवी भण्डारीज्यूले नेपालको संविधानको धारा ७८ बमोजिम मिति २०७८ चैत २४ गते माननीय कानुन न्याय तथा संसदीय मामिला मन्त्री पदमा नियुक्त हुनु भएका श्री गोविन्दप्रसाद शर्मा (कोइराला) ले नेपालको संविधानको सोही धारा बमोजिम संघीय संसद्को सदस्यता प्राप्त गर्न नसकी निजको पदावधि सकिएकोले सम्माननीय प्रधानमन्त्रीज्यूको सिफारिसमा निजले सम्हाली आउनुभएको कानुन न्याय तथा संसदीय मामिला मन्त्रालयको कार्यभार माननीय सञ्चार तथा सूचना प्रविधि मन्त्री श्री ज्ञानेन्द्रबहादुर कार्कीज्यूले सम्हाल्ने गरी तोक्नु भएको छ ।