भक्तपुर – नेपाल मजदुर किसान पार्टी नेमकिपाका अध्यक्ष नारायणमान बिजुक्छेँले परम्परागत र मौलिक स्वरुपका घरहरूको संरक्षण गर्नुपर्ने बताउनुभएको छ।

पच्चीसौँ राष्ट्रिय भूकम्प सुरक्षा दिवसका अवसरमा ख्वप इञ्जीनियरिङ कलेज र ख्वप कलेज अफ इञ्जीनियरिङले संयुक्तरूपमा बिहीबार दत्तात्रयमा आयोजना गरेको जनचेतनामूलक शैक्षिक प्रदर्शनी कार्यक्रममा बिजुक्छेँले परम्परागत र मौलिक स्वरुपका घरहरूको लोप हुन लागेकामा चिन्ता व्यक्त गर्दै त्यस्ता घरहरूको संरक्षण गर्नुपर्ने बताउनुभएको हो।

उहाँले भवन निर्माणमा आधुनिक तथा नयाँ–नयाँ प्रविधि प्रयोग बढेसँगै मौलिक घर लोप हुँदै गएको बताउनुभयो। उहाँले देखावटीको निम्ति मात्र पुरानो शैलीको घर निर्माण गर्नु गलत भएको धारणा राख्नुभयो। उहाँले माटो जोडाइ, ढुङ्गा र काठ तथा प्राकृतिक स्रोतको प्रयोगबाट मौलिक शैलीमा घर निर्माण गर्नेतर्फ अनुसन्धानको आवश्यकता रहेको खाँचो औँल्याउनुभयो ।

भक्तपुर नगरपालिकाका प्रमुख सुनिल प्रजापतिले नगरपालिकाले भौतिक पूर्वाधार तथा निर्माण मापदण्ड तयार गरी भूकम्प प्रतिरोधी संरचना निर्माणका लागि आवश्यक व्यवस्था मिलाउँदै आएको जानकारी दिनुभयो।

ख्वप इञ्जीनियरिङ कलेज र ख्वप कलेज अफ इञ्जीनियरिङबाट विकास निर्माणका लागि आवश्यक दक्ष जनशक्ति उत्पादन गरी बलियो र भरपर्दो निर्माणका लागि राष्ट्रियरूपमा टेवा पु¥याउँदै आएको बताउनुभयो। नगरप्रमुख प्रजापतिले नपाले प्रत्येक वर्ष भवन निर्माण कार्यमा संलग्न डकर्मी, सिकर्मीलगायत प्राविधिकलाई भूकम्प प्रतिरोधी प्रविधिसम्बन्धी तालिम प्रदान गर्ने जानकारी दिनुभयो ।

प्रमुख जिल्ला अधिकारी रुद्रादेवी शर्माले भूकम्पलगायत विपद्का बेला सुरक्षित बसोबासका लागि खुला क्षेत्र र सार्वजनिक ठाउँको संरक्षणमा स्थानीय तहले आवश्यक पहल गर्नुपर्ने बताउनुभयो। कलेजका प्राचार्यद्वय सुजन माक र सुनिल दुवाल, उपप्राचार्य रत्नशोभा प्रजापतिले भूकम्प प्रतिरोधी क्षमता विकास गर्न भूकम्पसम्बन्धी अध्ययन, अनुसन्धानलाई निरन्तरता दिनुपर्ने र भूकम्प विषयमा स्नातकोत्तर विषयको अध्ययन अध्यापन सञ्चालन गरेकै कारण यस किसिमको शैक्षिक प्रदर्शनी गर्न सफल भएको बताउनुभयो।