काठमाडौँ-देशका प्रमुख सहरहरूको मौसम बुधबार निकै उतारचढावपूर्ण रहने देखिएको छ। जल तथा मौसम विज्ञान विभागको पूर्वानुमान अनुसार आज देशका केही भूभागमा अत्यधिक गर्मी हुनेछ भने धेरैजसो पहाडी र पूर्वी भेगमा मेघगर्जन र चट्याङसहित वर्षा हुनेछ।

विशेषगरी तराईका पश्चिमी र मध्य सहरहरूमा आज दिउँसो अत्यधिक गर्मी हुनेछ। पूर्वानुमान अनुसार धनगढी र नेपालगञ्जको मौसम आज तातो दिन रहनेछ, जहाँ अधिकतम तापक्रम ३८ देखि ४० डिग्री सेल्सियससम्म पुग्ने अनुमान गरिएको छ। यसैगरी भैरहवामा ३६ देखि ३८ डिग्री र सिमरामा ३४ देखि ३६ डिग्री सेल्सियस तापक्रमसहित दिनभरि नै तातो दिन महसुस हुनेछ। यी क्षेत्रहरूमा आज वर्षाको कुनै सम्भावना नरहेको पूर्वानुमानमा उल्लेख छ।