काठमाडौँ-रसुवाको भोटेकोशी र त्रिशूली नदीमा २०८३ भदौ १० गते एक्कासी विनासकारी आएको बाढीका कारण पाँच जिल्लाका ४९ वटा वडा प्रभावित भएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीबाट रसुवाका चार स्थानीय तहका ११ वटा वडा प्रभावित भएका छन्। प्रभावित स्थानीय तहमा उत्तरगया, गोसाइँकुण्ड, आमाछोदिङमो र कालिका गाउँपालिका रहेका छन्।

रसुवामा सबैभन्दा बढी क्षति उत्तरगया गाउँपालिकामा भएको छ। गाउँपालिकाका पाँचवटै वडा बाढीबाट प्रभावित भएका छन्। त्यस्तै, गोसाइँकुण्ड गाउँपालिकाका चार वडा तथा आमाछोदिङमो गाउँपालिकाका दुई वडा प्रभावित भएका छन्।

नुवाकोटका तारकेश्वर, किस्पाङ, विदुर र बेलकोटगढीका गरी ११ वटा वडा प्रभावित भएका छन्।

त्यसैगरी, धादिङका गल्छी, गजुरी, बेनिघाट रोराङ र सिद्धलेक गाउँपालिकाका १८ वटा वडा बाढीबाट प्रभावित भएका छन्। गोरखाको गण्डकी गाउँपालिकाका पाँच वडा तथा तनहुँका देवघाट र आँबुखैरेनी गाउँपालिकाका चार वडा प्रभावित भएको प्राधिकरणले जनाएको छ।

सरकारले बाढीबाट प्रभावित पाँच जिल्लाका १५ स्थानीय तहलाई विपद् सङ्कटग्रस्त क्षेत्र घोषणा गरिसकेको छ।

बाढीबाट हालसम्म ९०३ जनाको मृत्यु भएको छ भने ४ हजार २४७ जना बेपत्ता रहेको तथ्याङ्क सार्वजनिक गरिएको छ। बाढीको प्रभाव र खोज तथा उद्धार कार्य जारी रहेकाले मृतक र बेपत्ताको संख्या अझै बढ्न सक्ने अनुमान गरिएको छ।