काठमाडौं – नेकपा एमालेका अध्यक्ष केपी शर्मा ओलीले स्थानीय तह निर्वाचनमा पाँच दल एकातिर हुँदा पनि नेकपा एमालेको परिणाम राम्रो आएको बताउनु भएको छ ।

पार्टीको जनसंगठन समन्वय संयन्त्रको बैठकलाई बिहीबार सम्बोधनका क्रममा उहाँले यस्तो बताउनु भएको हो ।

अध्यक्ष ओलीको भनाइ उदृत गर्दै प्रचार विभाग उपप्रमुख विष्णु रिजालले भन्नुभयो- ‘जनताले नेकपा एमाले लाई माया गरेका छन् र लोकप्रिय पहिलो मत दिएका छन् । हामी जनताप्रति आभारी छौं । तर, समस्या हामीभित्रै देखिएको छ । आफ्नै पार्टीभित्र एउटाले अर्कालाई हराउन खोज्दा दुबैले हार्ने स्थिति बन्यो । नेताहरूबीच मेल भएन, टीम स्पिरिट भएन । यथार्थमा पार्टीलाई आफ्नै नेताहरूबाट कसरी बचाउने भन्ने चुनौती थपिएको छ ।’

उक्त बैठकमा अध्यक्ष ओलीले स्थानीय तह निर्वाचन परिणामबारे विश्लेषण गर्दै  उहाँले भन्नुभयो, ‘यो निर्वाचनमा एकातिर एमाले थियो। अर्कातिर पाँच दल थिए। यति हुँदा पनि एमालेको लोकप्रिय मत आयो ।’