काठमाडौं-अखिल नेपाल फुटबल संघ (एन्फा) भित्रको विवाद र आर्थिक अनियमितताको विषयले नयाँ मोड लिएको छ। बहुमत कार्यसमिति सदस्यको उपस्थितिमा शुक्रबार बसेको बैठकले प्रहरीको केन्द्रीय अनुसन्धान ब्युरो (सीआईबी)को अनुसन्धानमा परेका अध्यक्षसहित चार पदाधिकारीसँग घटनाबारे लिखित जवाफ माग्ने निर्णय गरेको छ।

वरिष्ठ उपाध्यक्ष वीरबहादुर खड्काको नेतृत्वमा सातदोबाटोस्थित एन्फा कम्प्लेक्समा बसेको बैठकले अध्यक्ष पंकजविक्रम नेम्वाङ, महासचिव किरण राई, कोषाध्यक्ष रविन्द्र जोशी र लेखा अधिकृत सञ्जीव पाण्डेसँग लिखित विवरण माग्ने निर्णय गरेको हो।

एन्फाको आर्थिक कारोबारमा अनियमितता गरेको आरोपमा सीआईबीले अनुसन्धान गरी मुद्दा चलाएपछि चारै जना अदालतबाट धरौटीमा रिहा भएका थिए। अध्यक्ष नेम्वाङ र महासचिव राई जनही पाँच लाख रुपैयाँ, कोषाध्यक्ष जोशी १५ लाख तथा लेखा अधिकृत पाण्डे १२ लाख रुपैयाँ धरौटीमा छुटेका थिए।

बैठकले अन्तर्राष्ट्रिय फुटबल महासंघ (फिफा)ले एन्फामाथि लगाएको निलम्बन फुकुवाका लागि पहल गर्न उपाध्यक्ष विराटजंग शाहीको संयोजकत्वमा पाँच सदस्यीय समिति पनि गठन गरेको छ। समितिका सदस्यमा टीका लामा, मनिष जोशी, दीपक खतिवडा र कुमार केसी रहेका छन्।

समितिलाई बैठकका निर्णय राष्ट्रिय खेलकुद परिषद् (राखेप)लाई जानकारी गराउने, एन्फामा सरकारको हस्तक्षेप नरहेको विषय स्पष्ट पार्ने तथा फिफा र एसियाली फुटबल महासंघ (एएफसी)सँग आवश्यक समन्वय गर्ने जिम्मेवारी दिइएको छ।

बैठकमा २० सदस्यीय कार्यसमितिमध्ये ११ जना सदस्य सहभागी थिए। अध्यक्ष नेम्वाङ र महासचिव राई भने बैठकमा अनुपस्थित रहे। महासचिवको अनुपस्थितिमा उनले निर्वाह गर्ने जिम्मेवारी सहसचिव बद्री भट्टराईलाई दिइएको छ।

यसअघि एन्फा मुख्यालयमा लगाइएको ताला दुई दिनअघि खुलेपछि बहुमत कार्यसमिति सदस्यहरूले छलफल गरेका थिए। सोही छलफलपछि शुक्रबार कार्यसमिति बैठक बसेको हो।

एन्फाभित्रको विवाद, आर्थिक अनियमितताको आरोप र फिफाको निलम्बन फुकुवाका लागि भइरहेको पहलले नेपाली फुटबलको नेतृत्व र संस्थागत व्यवस्थापनमाथि थप प्रश्न उठाएको छ।