काठमाडौँ–नेपाल प्रहरीका महानिरीक्षक (आइजिपी) बसन्तबहादुर कुँवरले शुक्रबार भौतिक, पूर्वाधार तथा यातायात मन्त्री प्रकाश ज्वाला नगएको भए बालकुमारीमा दुई जना युवाको ज्यान जाने गरी घटना नहुने बताउनुभएको छ । सोमबार राज्य व्यवस्था तथा सुशासन समितिको बैठकमा आइजिपी कुँवरले मन्त्री ज्वाला त्यहाँ नपुगेको भए उक्त घटना नहुने बताउनुभएको हो । 

आइजीपी कुँवरले बालकुमारीमा प्रहरीले बल प्रयोग नगरेको भए थप गम्भीर घटना निम्तन सक्ने बताउनुभयो । उहाँले घटनास्थलको अवस्थाको बारेमा मन्त्रीको पीएसओले समेत समन्वय नगरेको बताउनुभयो ।

‘साढे ११ मा सामान्य बल प्रयोग भयो । ११:५२ मा मन्त्रीज्यू पार्टी प्यालेसबाट कोटेश्वरतर्फ जाँदै गरेको अवस्था थियो । त्यही बेलामा पिएसओले जानकारी लिने समन्वय गरेन । ११:५४ मा हातपात हुने अवस्था आयो,’ उहाँले भन्नुभयो, ‘पिएसओले मन्त्रीलाई सुरक्षित स्थानमा लगेको थियो । १२ बजे मन्त्रीको आगो लागेको हो । गोली कतिबेला चल्यो यकिन छैन । मन्त्रीको गाडी नआएको भए यस्तो घटना हुने थिएन ।’ 

आइजीपी कुँवरले मन्त्री ज्वालालाई नै गाडीमै राखेर जलाउन लाग्यो भन्ने अवस्था सिर्जना भएपछि प्रहरीले धर्यता गुमाएको बताउनुभएको छ ।