काठमाडौँ– काठमाडौँको न्यूनतम तापक्रम आज यो वर्षकै कम मापन गरिएको छ । आज काठमाडौँको तापक्रम ३.० डिग्री सेल्सियस मापन गरिएको हो । 

यो तापक्रम यस वर्ष अहिलेसम्मकै कम भएको मौसम पूर्वानुमान महाशाखाले जनाएको छ ।

महाशाखाका अनुसार यो वर्ष यसअघि काठमाडौँको कम तापक्रम माघ ८ गते मापन गरिएको थियो । त्यस दिन काठमाडौँको न्यूनतम तापक्रम ३.२ डिग्री सेल्सियस थियो ।

हिजो काठमाडौँको तापक्रम ३.५ डिग्री सेल्सियस मापन गरिएको महाशाखाले जनाएको छ ।  

यस्तै महाशाखाले काठमाडौँमा आज आंशिक बदलीको सम्भावना रहेको छ । तर वर्षाको सम्भावना भने  न्यून रहेको महाशाखाको भनाइ छ ।

यस्तै आज जुम्लाको न्यूनतम तापक्रम माइनस ४.४, दिपायलको ०.८, डडेलधुराको १.७, धनगढीको १।८ वीरेन्द्रनगरको २.०, ताप्लेजुङको २.८ डिग्री सेल्सियस मापन गरिएको छ ।  

यस्तै देशका तराईका  अधिकांश भू–भागहरूमा हुस्सु/कुहिरो लागेको छ । बिहानको समयमा तराईका अधिकांश भू–भागहरूमा  लागेको बाक्लो हुस्सु/कुहिरो मध्यान्न/अपरान्ह सम्ममा क्रमिक रुपमा सुधार हुँदै जाने सम्भावना रहेको महाशाखाले जनाएको छ । 

महाशाखाका अनुसार हुस्सु/कुहिरोको प्रभावले दैनिक जनजीवन, स्वास्थ्य, सडक तथा हवाई यातायातमा समेत प्रभाव पर्न सक्ने सम्भावना रहेको छ । महाशाखाले चिसोबाट बच्न आवश्यक उपायहरू तथा सतर्कता अपनाउन अनुरोध गरेको छ ।