काठमाडौँ– काठमाडौँ उपत्यकामा आज हालसम्मकै बढी जाडो मापन गरिएको छ । आज काठमाडौँ उपत्यकामा न्यूनतम तापक्रम २.२ डिग्री सेल्सियस मापन गरिएको हो । 

गत बिहीबार र शुक्रबार काठमाडौँको न्यूनतम तापक्रम ३ डिग्री सेल्सियस थियो । तत्काल हिउँदे वर्षाको सम्भावना नभएकाले जाडो अझै बढ्न सक्ने सम्भावना रहेको जल तथा मौसम विज्ञान विभागले जनाएको छ । 

यस्तै आज तराई र मधेसका अधिकांश स्थानमा बाक्लो हुस्सु–कुहिरो लागेको छ । हुस्सु–कुहिरोले तराईको दैनिक जनजीवन, स्वास्थ्य, यातायात तथा हवाई यातायातमा प्रभाव पर्न सक्ने सम्भावना रहेको विभागले जनाएको छ । 

यस्तै आज कोशी, बागमती, गण्डकी र कर्णाली प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको छ । चिसोबाट बच्न आवश्यक उपायहरू तथा सतर्कता अपनाउन विभागले अनुरोध गरेको छ।