झापा- नेकपा एमालेका केन्द्रीय सदस्य विष्णु रिजालले एमालेको आन्तरिक एकतामा प्रभाव पार्ने र विग्रह ल्याउने प्रयासहरु भइरहेका भए पनि नेपालको कम्युनिष्ट आन्दोलनले केपी ओलीलाई निरन्तर अध्यक्ष चाहिरहेको बताउनुभएको छ ।
राष्ट्रिय मानवअधिकार तथा सामाजिक न्याय मञ्च नेपाल (मानवअधिकार एलायन्स)को इन्चार्जसमेत रहेका नेता रिजालले केपी ओलीको विकल्प खोज्ने बेला नभएको बताउँदै उहाँको नेतृत्व एमालेका लागि मात्र नभएर देशकै लागि आवश्यक रहेको बताउनुभएको हो ।
झापाको बिर्तामोडमा आज शनिबार आयोजित मानवाधिकार एलायन्सको जिल्लास्तरीय अभिमुखीकरण कार्यक्रममा बोल्दै नेता रिजालले पार्टीको एघारौं महाधिवेशन आगामी मंसीरमा वा फागुनसम्ममा सम्पन्न हुने बताउनुभयो ।
पार्टीको विधान महाधिवेशन आगामी भदौको अन्तिम साता तय भइसकेको सुनाउँदै उहाँले विधान महाधिवेशन सम्पन्न भएको ६ महिना भित्रमा पार्टीको महाधिवेशन गर्ने वैधानिक व्यवस्थालाई पालना गर्दै फागुनसम्मा सम्पन्न गरिने उहाँको भनाइ छ ।
पार्टीको महाधिवेशन मुलतः नयाँ नेतृत्व चयनमा केन्द्रित रहने गर्दा पार्टी सञ्चालन गर्ने नीति विधिमाथि छलफल गर्न महाधिवेशनमा ध्यान नरहने भएकाले विधान महाधिवेशनको थालनी गरिएको उनले बताउनुभयो ।
नेकपा एमाले पार्टी र मानवाधिकारको अन्तरसम्बन्ध केलाउँदै मानव अधिकार एलायन्सका इन्चार्ज रिजालले समृद्ध नेपाल सुखी नेपालीको अवधारण भनेको नै मानवाधिकारको पक्षमा काम गर्ने र जनतालाई सुख दिँदै मुलुकको मुहार फेर्ने दृष्टिकोण भएको बताउनुभयो ।
आगमी २०८४ को निर्वाचनमा नेकपा एमाले बहुमत प्राप्त दल बन्ने र एकल सरकारको नेतृत्व गर्न पाउने गरी काम गर्नु परेको छ भन्दै पार्टीका केन्द्रीय सदस्य रिजालले हरेक जनसंगठनको नेता आफ्नो गाउँटोलका बासिन्दासँग निरन्तर भेटघाट गर्न र दुःख सुखमा उठबास गर्न आवश्यक रहेको औंल्याउनुभयो ।
‘माथि माथि नेता नेतृत्वसँग सम्बन्ध विकास गर्ने तर तलका जनता समक्ष आफ्नो उपस्थिति नदेखाउने हो भने पछि उम्मेदवारी पाउने कुरामा र विजयी हुने कुरामा समस्यामा पर्नुहोला’, नेता रिजालको सुझाव थियो ।
मानवअधिकार एलायन्स झापाका अध्यक्ष अर्जुनकुमार पाठकको अध्यक्षता तथा केन्द्रीय अध्यक्ष बिदुर सुवेदीको प्रमुख आतिथ्यमा आयोजित सो जिल्लास्तरीय भेलामा सुबेदीसहित नेकपा एमाले झापाका अध्यक्ष प्रेम गिरीले विषयगत प्रस्तुतिहरु गरेका थिए ।