काठमाडौँ-संयुक्त अरब इमिरेट्स (यूएई) जान लागेका नेपाली नागरिकको राहदानी (पासपोर्ट) मा ‘रोजगारी निषेध’ सम्बन्धी छाप लगाएको विषयमा अध्यागमन विभागले दुई जना अधिकृतलाई कारबाही गरेको छ। 

प्रचलित कानुन र विभागीय निर्णयविपरीत गैरकानुनी अभ्यास गरेको भन्दै विभागले त्रिभुवन अन्तर्राष्ट्रिय विमानस्थल अध्यागमन कार्यालयमा कार्यरत दुई जना अध्यागमन अधिकृतहरूलाई जिम्मेवारीबाट हटाएको हो।

विभागले यस विषयमा विस्तृत छानबिनका लागि समिति गठन गरेको छ। समितिले घटनाको कारण, प्रक्रिया र जिम्मेवारीबारे अध्ययन गरी प्रतिवेदन बुझाउनेछ।

यो घटना युनाइटेड अरब इमिरेट्स (यूएई) जान लागेका यात्रुको पासपोर्टमा प्रस्थान छापसँगै ‘२०२६ जुन १० सम्म काम गर्न निषेध’ भन्ने लेखिएको सूचना सार्वजनिक भएपछि बाहिर आएको हो। यसपछि विभागले वैशाख ३ गते नै छानबिन समिति गठन गर्ने निर्णय गरेको जनाएको छ।

अध्यागमन विभागका प्रवक्ता टीकाराम ढकालले आज एक विज्ञप्ति जारी गर्दै नेपाली नागरिकलाई शर्त तोकेर प्रस्थान अनुमति दिने अध्यागमन प्रशासनको कुनै पनि नीति वा निर्णय नभएको स्पष्ट पारेका छन् । नीतिगत व्यवस्थाभन्दा बाहिर गएर काम गर्ने दुई अधिकृतलाई विमानस्थलको जिम्मेवारीबाट तत्काल हटाइएको र उनीहरूमाथि थप आवश्यक छानबिन भइरहेको विभागले जनाएको छ।

अध्यागमन प्रशासनले आफ्ना कर्मचारीहरूलाई प्रचलित ऐन, नियम र विभागीय परिपत्र अनुसार मात्र कार्य सम्पादन गर्न सचेत गराउँदै यस्ता गैरकानुनी गतिविधिमा संलग्नलाई कारबाहीको दायरामा ल्याउने प्रतिबद्धता समेत व्यक्त गरेको छ।