उदयपुर- उदयपुरको चौदण्डीगढी नगरपालिका–७, बेल्टार बजारस्थित पुष्पलाल चोकमा गएराति आगलागी हुँदा जलेर दुई जनाको मृत्यु भएको छ । आगलागीले दुई घर जलेर पूर्ण रूपमा नष्ट भएका छन् भने जलेको अवस्थामा दुई जनाको शवको कंकाल फेला परेको छ ।
इलाका प्रहरी कार्यालय बेल्टारका इन्स्पेक्टर प्रभाप लिम्बूले घटनास्थलबाट दुई जनाको जलेको अवस्थामा कंकाल फेला परेको जानकारी दिए। उनले भने, ‘शवको पहिचान खुल्न बाँकी छ । सनाखत नभएसम्म शव कसको हो भन्ने पुष्टि गर्न सकिने अवस्था छैन ।’
प्रारम्भिक अनुसन्धान अनुसार विद्युत् सर्ट भएका कारण आगलागी भएको अनुमान गरिएको छ । आगलागीबाट स्थानीय लक्ष्मी खड्का र रविन कुमार दासको घर पूर्ण रूपमा जलेको प्रहरीले जनाएको छ ।

आगो नियन्त्रणका लागि चौदण्डीगढी नगरपालिका, त्रियुगा नगरपालिका, रौतामाई गाउँपालिका तथा मधेश प्रदेशअन्तर्गत सप्तरीको कञ्चनरूप नगरपालिकाबाट दमकल परिचालन गरिएको थियो । साथै नेपाल प्रहरी, सशस्त्र प्रहरी, नगर प्रहरी र स्थानीयवासीको सक्रिय सहयोगमा करिब तीन घण्टापछि आगो नियन्त्रणमा लिइएको थियो ।

आगलागीबाट भएको क्षतिको विस्तृत विवरण संकलन भइरहेको प्रहरीले जनाएको छ । इन्स्पेक्टर लिम्बूले भने, ‘हामी घटनास्थलमै छौँ। मृतकको सनाखत र क्षतिको विवरण संकलनमा जुटेका छौँ ।’ प्रहरीले घटनाबारे थप अनुसन्धान जारी राखेको जनाएको छ भने विस्तृत विवरण आउन बाँकी रहेको छ ।