काठमाडौं-नेकपा (एमाले) को ‘निर्वाचन समीक्षा तथा पार्टी पुनर्गठन कार्यदल’को बैठक पार्टी केन्द्रीय कार्यालय च्यासलमा सुरु भएको छ। पार्टीलाई अझ प्रभावकारी, जनमुखी र संगठित बनाउने उद्देश्यसहित गठित कार्यदलको बैठकमा अहिले व्यापक छलफल भइरहेको छ।

बैठकमा कार्यदलका संयोजक तथा पार्टी उपाध्यक्ष रामबहादुर थापा ‘बादल’ र महासचिव शंकर पोखरेलले तयार पारेका प्रतिवेदनमाथि विस्तृत छलफल हुने जनाइएको छ। प्रतिवेदनमा पछिल्लो निर्वाचनको समग्र समीक्षा, पार्टी संगठनको वर्तमान अवस्था, जनतासँगको सम्बन्ध सुदृढीकरण, कार्यकर्ता परिचालन तथा आगामी राजनीतिक रणनीतिबारे सुझाव समेटिएको बताइएको छ।

एमालेले पछिल्लो निर्वाचनबाट प्राप्त अनुभव र चुनौतीलाई अवसरका रूपमा रूपान्तरण गर्दै संगठनलाई नयाँ ऊर्जा र गतिका साथ अघि बढाउने लक्ष्य राखेको छ। सोही उद्देश्यअनुसार कार्यदलले केन्द्रदेखि तल्लो तहसम्मका नेता–कार्यकर्ताको सुझाव संकलन गरी प्रतिवेदन तयार पारेको बताइएको छ। पार्टीलाई समयानुकूल, सशक्त र जनविश्वासको केन्द्र बनाउने विषयमा बैठक केन्द्रित रहने नेताहरूको भनाइ छ।

कार्यदलले तयार पारेका सुझावहरू आगामी दिनमा पार्टीको संगठनात्मक सुदृढीकरण, नेतृत्व विकास, कार्यशैली सुधार तथा जनतासँगको सम्बन्ध विस्तारका लागि मार्गदर्शक बन्ने अपेक्षा गरिएको छ। एमाले नेतृत्वले समीक्षा र पुनर्गठन प्रक्रियालाई पार्टीलाई थप एकताबद्ध, गतिशील र प्रतिस्पर्धी बनाउने अवसरका रूपमा लिएको जनाएको छ।

गत जेठ १० गते निर्वाचनको समीक्षा र पार्टी पुनर्गठन गर्न उपाध्यक्ष थापाको नेतृत्वमा गठित १५ सदस्यीय कार्यदल गठन भएको थियो ।