काठमाडौं-नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले बाढी प्रभावित नुवाकोट र रसुवामा राहत तथा उद्धारका लागि खटिन लागेको एमाले सम्पर्क विशेष सङ्गठन कमिटीको टोलीलाई बिदाइ गरेका छन्।

शुक्रबार टोलीलाई बिदाइ गर्दै अध्यक्ष ओलीले बाढी प्रभावित क्षेत्रमा पुगेर पीडितको अवस्था बुझ्न, आवश्यक राहत उपलब्ध गराउन तथा उद्धार कार्यमा प्रभावकारी रूपमा सहयोग गर्न निर्देशन दिएका हुन्।

एमाले सम्पर्क विशेष सङ्गठन कमिटीले बाढी प्रभावित नागरिकलाई राहत तथा उद्धारमा सहयोग पुर्‍याउने उद्देश्यले टोली परिचालन गरेको हो। टोलीले नुवाकोट र रसुवाका प्रभावित क्षेत्रमा पुगेर राहत वितरण तथा उद्धार कार्यमा सहयोग गर्ने जनाइएको छ।

गत भदौ १० गते रसुवाको भोटेकोशी नदीमा आएको विनाशकारी बाढीले रसुवा, नुवाकोट, धादिङलगायतका जिल्लामा ठूलो मानवीय तथा भौतिक क्षति पुर्‍याएको छ। पछिल्लो नेपाल प्रहरीको विवरणअनुसार बाढीमा हालसम्म १ हजार ३ सय ८४ जनाको शव फेला परेको छ भने ४ हजार ८९ जना अझै बेपत्ता छन्। फेला परेका शवमध्ये रसुवामा १८५, नुवाकोटमा १९९ र धादिङमा ७० जनाको शव भेटिएको छ।

बाढीका कारण घरबास गुमाउने तथा विस्थापित हुनेको संख्या पनि ठूलो छ। रसुवा, नुवाकोट र धादिङमा मात्रै ७ हजार ५७० भन्दा बढी निजी आवासमा पूर्ण वा आंशिक क्षति पुगेको प्रारम्भिक विवरण छ। निजी आवासमा मात्रै करिब १२ अर्ब रुपैयाँ बराबरको क्षति भएको अनुमान गरिएको छ। बाढी प्रभावित ३ हजार ४५० जनालाई होल्डिङ सेन्टरमा राखिएको र अस्थायी आवास निर्माणको तयारी भइरहेको छ।

भौतिक पूर्वाधारतर्फ पनि बाढीले व्यापक क्षति पुर्‍याएको छ। सडक विभागको विवरणअनुसार रसुवा, नुवाकोट र धादिङमा ३२ वटा पुल पूर्ण रूपमा बगेका छन्। यसबाहेक झोलुङ्गे पुल, सडक, सरकारी भवन तथा अन्य संरचनामा समेत ठूलो क्षति पुगेको छ। बागमती प्रदेश सरकारको प्रारम्भिक मूल्यांकनअनुसार नुवाकोट, रसुवा, धादिङ र चितवनमा सडक पुल, झोलुङ्गे पुल तथा सरकारी भवनलगायतका संरचनामा अर्बौँ रुपैयाँ बराबरको क्षति भएको छ।

बाढीको प्रभाव शिक्षा क्षेत्रमा समेत गम्भीर देखिएको छ। शिक्षा तथा खेलकुद मन्त्रालयको पछिल्लो विवरणअनुसार रसुवा, नुवाकोट र धादिङका ३२ विद्यालयका ९ हजार ४ सय बालबालिका प्रभावित भएका छन्। तीमध्ये ३ हजार ९२८ जना प्रत्यक्ष प्रभावित र १ हजार ३७३ जना विस्थापित भएर होल्डिङ सेन्टरमा बसिरहेका छन्। प्रारम्भिक विवरणमा ४८८ विद्यार्थी सम्पर्कविहीन र पाँच विद्यार्थीको मृत्यु भएको उल्लेख छ। बाढीबाट प्रभावित ३२ विद्यालयका ५२७ कक्षाकोठामध्ये २६८ वटा पूर्ण रूपमा क्षतिग्रस्त भएका छन्।

बाढीले पुर्‍याएको क्षतिको पूर्ण विवरण अझै संकलन तथा खोजीको क्रममा रहेकाले मृतक, बेपत्ता, विस्थापित तथा भौतिक संरचनाको क्षतिको संख्या थप परिवर्तन हुन सक्ने सरकारी निकायहरूले जनाएका छन्।