काठमाडौं-नेकपा (एमाले) अध्यक्ष केपी शर्मा ओलीले दुई मुख्य कार्यभार र १५ कामलाई कार्यान्वयन गर्न तथा अनुशासन र निष्ठामा रहन निर्देशन दिएका छन्। अध्यक्ष ओलीले हालै सम्पन्न पार्टीको तेस्रो पूर्ण केन्द्रीय कमिटी बैठकबाट पार्टीभित्रको सन्देह सकिएको दाबीसमेत गरेका छन्।

मंगलबार कोशी, मधेस, बागमती, उपत्यका विशेष र सम्पर्क समन्वय प्रदेशका सचिवालय सदस्यहरूलाई भर्चुअल सम्बोधन गर्दै अध्यक्ष ओलीले यस्तो बताएका हुन्।

‘अब पार्टीभित्र बढ्दो अराजकता र अनुशासनहीनता चल्दैन। केन्द्रीय कमिटीको बैठकलाई हामीले ‘कट–अफ डेट’ मानेका छौँ’, अध्यक्ष ओलीले भने, ‘अब पार्टीको नीति र अनुशासनविपरीत जाने, अराजकता फैलाउने वा विपक्षीलाई रमाउने गरी बोल्ने जोकोहीमाथि कडा कारबाही हुनेछ।’

त्यसक्रममा अध्यक्ष ओलीले ‘लोकतन्त्रको पुनर्वहाली’ र ‘आगामी वैशाखमा हुने स्थानीय निर्वाचनको तयारी’ पार्टीको मुख्य गन्तव्य भएको स्पष्ट पारे ।

‘दुई कार्यभार कतिखेर कुनमा फोकस हुने कुरा पार्टीले निर्धारण गर्छ। निर्वाचनमा फोकस हुन्छौँ र जित्छौँ । जनसंगठनहरू डिफङ्क छन्। अब रिअर्गनाइज हुन्छ’, अध्यक्ष ओलीले भने, ‘पुनर्गठन भनेर अध्यक्ष हटाउने भनियो । यो अपराधपूर्ण क्रियाकलाप हो । केन्द्रीय कमिटीअघिका यी सबै क्षमा भयो। तर अब क्षमा हुँदैन। हामी कुनै प्रतिनिधि परिषद् बैठकतिर लाग्दैनौँ। यो चुनावको तयारीको बेला हो। कोराकोर, हानाहान गर्ने होइन।’

नेता-कार्यकर्ताहरूलाई अर्जुन दृष्टिजस्तै एउटै लक्ष्यमा केन्द्रित हुन र ब्रुसलीको एकाग्रताजस्तै सम्पूर्ण तागत संगठन निर्माणमा लगाउन निर्देशन दिँदै ओलीले देशलाई जबरजस्ती पछाडि फर्काउने, संवैधानिक प्रक्रिया मिच्ने र मुलुकमा विध्वंस तथा आतंक मच्चाउने प्रयास भइरहेकाले यसलाई रोक्न पार्टी एकताबद्ध भएर अघि बढ्नुपर्नेमा जोड दिए।

सम्बोधनका क्रममा अध्यक्ष ओलीले मुलुकको आर्थिक, राजनीतिक र सांस्कृतिक अवस्थालाई पछाडि धकेल्ने योजनाबद्ध षड्यन्त्र भइरहेको आरोपसमेत लगाए।

फागुनको निर्वाचनमा भोग्नुपरेको क्षति बाह्य आक्रमण, योजनाबद्ध विध्वंस र पार्टीभित्रको आन्तरिक कमजोरीका कारण भएको उल्लेख गर्दै अध्यक्ष ओलीले अबका दिनमा सामूहिक स्वार्थलाई अघि बढाउनुपर्नेमा जोड दिए।

अन्य कुनै दलसँग पार्टी एकताको चर्चा समयको बर्बादी मात्र हुने स्पष्ट पार्दै उनले अन्य शक्तिहरूसँग चुनावी तालमेल वा विषयगत कार्यगत एकता हुन सक्ने भए पनि अनावश्यक झमेलामा फस्ने गरी पार्टी एकताको चर्चा उपयुक्त नभएको बताए।

राजधानी वा सुविधाभोगी ठाउँमा बसेर जिल्ला वा कार्यक्षेत्रको जिम्मेवारी पूरा हुन नसक्ने भन्दै नेताहरूलाई ‘टुरिस्ट’ जस्तै नघुम्न र कार्यक्षेत्रमै खटिएर कार्ययोजना बनाउन कार्यकर्ताहरूलाई ओलीले निर्देशन दिए।

‘अब नेता–कार्यकर्ताको मूल्याङ्कन ज्येष्ठताका आधारमा होइन, काम र श्रेष्ठताका आधारमा हुन्छ’, अध्यक्ष ओलीले भने, ‘आफूलाई बदल्नुहोस्, शालीनता र विनम्रता सिक्नुहोस् । देश बनाउने स्पष्ट खाका र नीति एमालेसँग मात्रै छ, त्यसैले आत्मबलका साथ जनतामाझ पुगेर भरोसा जगाउनुहोस्।’

केन्द्रीय कमिटीले गरेको डिजिटल अभिलेख र संगठन सुदृढीकरणको काम यसै महिनाभित्र सम्पन्न गर्न र नयाँ सदस्यता वितरणलाई तीव्रता दिन सम्पूर्ण पार्टी पंक्तिलाई निर्देशन दिए ।

पार्टी केन्द्रीय कार्यालयबाट सञ्चालित सम्बोधन कार्यक्रममा उपाध्यक्षहरू रामबहादुर थापा ‘बादल’, विष्णु पौडेल, रघुजी पन्त, महासचिव शंकर पोखरेल, सचिवहरू पद्मा अर्याल, शेरधन राई, भानुभक्त ढकाल, डा. राजन भट्टराईलगायतका शीर्ष नेताहरूको उपस्थिति रहेको थियो।

भर्चुअल कार्यक्रमको सञ्चालन महासचिव पोखरेलले गरेका थिए।