काठमाडौं– प्रधानमन्त्री केपी शर्मा ओलीले आज स्थानीय तहको केन्द्रलाई प्रदेश सदरमुकामसम्म जोड्ने पक्की सडक निमार्ण कार्यको शुभारम्भ गर्दै हुनुहुन्छ ।
प्रधानमन्त्री ओलीले प्रधानमन्त्री निवास बालुवाटारबाट स्वीच अन गरी सो कार्यक्रमको शुभारम्भ गर्ने कार्यक्रम रहेको प्रधानमन्त्रीका प्रेस सल्लाहकार सूर्य थापाले जानकारी दिनुभयो । प्रादेशिक एवं स्थानीय सडक निर्माण तथा सुधार कार्यक्रम अन्तर्गत सञ्चालन गरिने सडक निर्माणको कार्य सातवटै प्रदेशमा एकसाथ सुरु हुँदैछ ।
हालसम्म पक्की सडकले प्रदेश राजधानीसँग नजोडिएका २८३ वटा स्थानीय तहलाई सडक सञ्जालले जोड्ने काम सुरु गरिने भएको हो ।
प्रधानमन्त्रीले शुभारम्भ गर्नुभएपछि सडक सञ्जालले नजोडिएका स्थानीय तहका जनप्रतिनिधि र सम्बन्धित प्रदेशका मुख्यमन्त्रीले निर्माण सम्बन्धी सम्झौता पत्रमा हस्ताक्षर गर्नुहुने कार्यक्रम छ । त्यसपछि प्रधानमन्त्री केपी शर्मा ओलीले कार्यक्रमलाई सम्बोधन गर्नुहुनेछ ।
सडक सञ्जाल निर्माणका लागि स्थानीय तह, प्रदेश सरकार र संघीय सरकार तीनै तहले संयुक्त लगानी गर्ने समझदारी भएको छ । सरकारको वार्षिक नीति तथा कार्यक्रममा उल्लेख भएबमोजिम संघीय सरकारले यस वर्षका लागि ५ अर्ब रुपैयाँ विनियोजन गरेको छ ।
सडक सञ्जालले नजोडिएका २८३ वटै स्थानीय तहमा आगामी पाँच वर्षभित्र सडक पुर्याइसक्ने लक्ष्य रहेको स्थानीय पूर्वाधार विकास विभागका महानिर्देशक ईश्वर माथेमाले बताउनुभएको छ ।
प्रतिक्रिया