चितवन– नवौं महाधिवेशनबाट निर्वाचित नेकपा एमालेको केन्द्रीय कमिटीको अन्तिम बैठक आज राति बस्दैछ ।

महाधिवेशनको उदघाटन समारोह सकिएपछि राति ९ बजे सौराहाको होटल जंगल क्राउनमा बैठक आयोजना गरिएको एमाले सचिव एवं प्रचार विभाग प्रमुख योगेश भट्टराईले जानकारी दिनुभयो । दिउँसो ७ बजे नै बैठक बस्ने भनिए पनि सवारी जामका कारण नेताहरुलाई नारायणगढस्थित उदघाटन स्थलबाट सौराहा फर्कन समस्या भएपछि ढिला हुने भएको हो ।

एमाले केन्द्रीय कमिटी बैठक स्थल भनिएको होटल जंगल क्राउन सजाइएको छ ।

केन्द्रीय कमिटीको बैठकमा विधान संशोधनको प्रस्ताव आउनसक्ने नेताहरुले बताएका छन् । नेताहरुले केन्द्रीय कमिटीको आकार बढाएर भएपनि सहमतिका आधारमा नेतृत्व चयन गर्नुपर्ने लबिइङ एमालेमा तीव्र छ ।

गते असोज १५–१७ मा भएको विधान महाधिवेशनबाट संशोधित एमालेको विधानअनुसार केन्द्रीय कमिटी २२५ सदस्यीय हुनेछ । विधान अनुसार अध्यक्ष, वरिष्ठ उपाध्यक्ष, चार उपाध्यक्ष, महासचिव, उपमहासचिव र ७ सचिव गरी १५ पदाधिकारी रहने छन् । पदाधिकारी संख्या २३ सम्म बनाउने र केन्द्रीय कमिटी २९९ सदस्यीय बनाउनेबारे छलफल सुरु भएको छ ।