काठमाडौं– नेकपा एमालेका अध्यक्ष केपी शर्मा ओलीले पदाधिकारी संख्या १९ बनाउने प्रस्ताव गर्नुभएको छ ।

सौराहामा चलिरहेको नवौं महाधिवेशनबाट निर्वाचन केन्द्रीय कमिटीको अन्तिम बैठकमा अध्यक्ष ओलीले पदाधिकारी संख्या १९ बनाउने प्रस्ताव गर्नुभएको हो । उहाँले दुई उपाध्यक्ष र दुई उपमहासचिव थप गर्ने प्रस्ताव गर्नुभएको छ । असोज तेस्रो साता भएको विधान महाधिवेशनले पारित गरेको विधानमा अध्यक्षसहित १५ पदाधिकारी रहने व्यवस्था छ । १५ सदस्यीय पदाधिकारीमा अध्यक्ष, वरिष्ठ उपाध्यक्ष, चार उपाध्यक्ष, महासचिव, उपमहासचिव र सात सचिव छन् ।

नयाँ प्रस्तावअनुसार अब वरिष्ठसहित ७ उपाध्यक्ष हुनेछन् भने उपमहासचिव तीन जना हुनेछन् ।

बैठकमा ओलीले २२५ सदस्यीय केन्द्रीय कमिटीलाई बढाएर ३०१ बनाउने र ९९ सदस्यीय पोलिटब्यूरो गठन गर्ने प्रस्ताव गर्नुभएको छ ।

केन्द्रीय कमिटीले निर्णय गरे विधान संशोधनका लागि बन्द सत्रमा पेस गरिनेछ ।

राति सवा १२ बजे पनि बैठक चलिरहेको छ ।

एमालेको नयाँ निर्णय
– केन्द्रीय कमिटी ३०१ सदस्यीय ।
– पोलिट्ब्युरो एक तिहाई सदस्यको बनाउने- ९९ सदस्यीय ।
– स्थायी ४५ यथावत् ।
– पदाधिकारी संख्या बढाउने- १९ सदस्यीय
– उपाध्यक्ष- ७
– उपमहासचिव- ३
– आयोगहरू- २५ सदस्यीय
– प्रदेश र जिल्लाको आधार संख्या- ७५