चितवन– नेकपा एमालेका अध्यक्ष केपी शर्मा ओलीले आफ्नो जीवनको ठेगान नभए पनि एमालेको नयाँ पंक्तिप्रति आफू आशावादी भएको बताउनुभएको छ ।
चितवनको सौराहामा भएको एमाले महाधिवेशनको बन्द सत्रलाई शनिबार सम्बोधन गर्दै अध्यक्ष ओलीले भावुक मन्तव्य पनि दिनुभएको हो । ‘म दुई दुई पटक मृर्गौला फेरेको, जीर्ण शरीर भएको व्यक्ति हुँ,’ उहाँको भनाइ थियो, ‘तर नयाँ पुस्ताको अनुहारमा मैले राष्ट्र निर्माणको भविष्य देखेको छु, यस्तो पार्टीको अध्यक्ष हुन पाएकोमा मलाई गर्व छ ।’
उहाँले पार्टीलाई एकतापूर्ण ढंगले अगाडि वढाएको भन्द नेता र कार्यकर्तालाई धन्यवादसमेत दिनुभयो । ‘म कति बाँच्छु भन्न सक्दिन, धेरैपटक मरेर बाँचेर आएको छु, तपाईहरुलाई देखेरै मलार्इ निद्रा लाग्छ खाना रुच्छ र देशको भविश्य सुरक्षित देख्छु,’ ओलीले बन्द सत्रमा भने ।
अध्यक्ष ओलीले आफ्नो पार्टीका नीतिहरूनै राष्ट्रिय नीति भएकोको बताउनुभयो । ‘आज एमालेका नीति नै राष्ट्रिय नीति हुन्। पाँच दलीय गठबन्धनले लागू गरेन भने उसको गल्ती हो। गठबन्धनको सरकारले सन्तुलित कूटनीति कायम गरेन। यो पनि उसको गल्ती हो,’ उहाँको भनाइ थियो ।
प्रतिक्रियावादी र तिनका पिछलग्गुको षडयन्त्रले दूरगामी असर पारेको ओलीको आरोप छ । ‘हामी सुखी नेपाली, समृद्ध नेपालको अभियानमा छौं । समृद्धि सामाजिक समानता, सद्भाव, राष्ट्रिय एकताको पक्षमा रहेका शक्तिसँग एकता हुन्छ । यसविरुद्धका प्रतिक्रियावादी शक्तिसँग कठोर संघर्ष गर्छौ,’ ओलीले भन्नुभयो ।
अध्यक्ष ओलीले पार्टीभित्र प्रतिस्पर्धा नभइ एकता गरेर अघि बढ्नुपर्ने बताउनुभयो । उहाँले भन्नुभयो ‘विपक्षीसँग प्रतिस्पर्धा गरौं, पार्टीभित्र एकता गरौं ।’
अध्यक्ष ओलीले एमालेबाट अन्य दलहरुले समेत सिक्न थालेको भन्दै एमालैकै मोडलमा एकैपटक तल्ला तहका कमिटीहरुका अधिवेशन गर्न सुरु भएको बउनुभयो ।
प्रतिक्रिया