गौरीगञ्ज- झापा गौरीगञ्जका माओवादी नेतासहित सयौै कार्यकर्ता एमाले प्रवेश गर्ने भएका छन् । माओवादीका १ नं. प्रदेश कमिटी सदस्य एवम माओवादीका प्रभावशाली नेता विद्यानन्दसिंह राजवंशी सहित सयौं माओवादी कार्यकर्ताहरु एमाले प्रवेशको तयारी गरेका छन् । उनीहरुलाई आज एमाले अध्यक्ष केपी शर्मा ओलीले पार्टी प्रवेश गराउने कार्यक्रम रहेको छ ।

माओवादी जनयुद्धको झापामा नेतृत्व गरेका राजवंशी तत्कालिन कोचिला राज्य समितिमा समेत रहेर काम गरिसकेका नेता हुन् । एमाले र माओवादीको पार्टी एकतापछि जिल्ला कमिटी सदस्यको जिम्मेवारी प्राप्त गरेका उनी अहिले माओवादीको प्रदेश कमिटीको जिम्मेवारीमा छन् ।
झापाको माओवादी आन्दोलनमा अग्रमोर्चामा रहेका राजवंशी गौरीगञ्जमा अधिकांश माओवादी सदस्यसहित एमाले प्रवेश गर्ने बुझिएको छ ।

०७४ को स्थानीय तह निर्वाचनमा माओवादीको तर्फबाट गाउँपालिकाको अध्यक्षको उम्मेरवार बनेका उनी ०७९ बैशाख ३० को निर्वाचनमा उपाध्यक्षको उम्मेरवार बनेका थिए । गठबन्धनबाट पटक–पटक धोका भएका कारण माओवादी आन्दोलन विलयको बाटोमा लागेको भन्दै उनले पार्टी परित्याग गरि एमाले प्रवेश गर्न लागेका हुन् ।
राजवंशीको एमाले प्रवेशसँगै गौरीगञ्जमा माओवादीको प्रभाव अत्यन्त न्यून देखिएको छ ।